Законот за недела да биде неработен ден ќе предизвика отпуштања до 30 отсто, застој во производството, повисоки трошоци, намалена продуктивност, неизвесна реализација на капиталните проекти и несигурен поврат на инвестициите, реагираа денеска од Стопанската комора.
Комората апелира Собранието да го преиспита ваквото решение и со Законот за работни односи да нема ограничувања, туку да се дозволи секоја дејност сама да одлучи дали ќе работи во недела.
Претставници на градежниците, обложувачниците и прехранбената индустрија денеска на прес-конференција потенцираа дека неработењето во недела не значи придобивка за работниците, како што некој сака да прикаже, туку е прашање што ги засега сите, и раководители, и инженери, и техничари, и директори, поради што мора соодветно да се реши.
„Законското решение, како што е сега конципирано и кое веќе помина на Влада, ќе предизвика сериозни негативни последици, социјални и економски. Проектите во градежништвото се врзани со рокови, а иницираната мерка ќе се одрази негативно не само врз нивната реализација, туку и врз исполнувањето на тие рокови, вклучувајќи ги тука и капиталните проекти од интерес за државата. Работата во градежништвото е теренска и на отворено, а кај инфраструктурните проекти подразбира и транспорт и патување на работниците, па доколку недела биде неработен ден, тоа сериозно би се одразило врз континуитетот на изведбата. Постои ризик и наместо посакуваната цел, да се предизвикаат спротивни ефекти кои нема да бидат од интерес ниту на компаниите како работодавачи, ниту на работниците“,
рече претседателот на Здружението на градежништвото, Андреа Серафимовски.
Според него, работниците ќе се соочат со зголемен обем на работа во текот на работните денови, а ќе им биде одземено правото да заработат повеќе со оглед дека дневниците во недела се повисоки од останатите работни денови. Од друга страна, компаниите ќе се соочат со поголеми транспортни трошоци и негативни последици од финансиски и од организациски карактер
Против ваквото решение се и компаниите од прехранбената индустрија кои нагласуваат дека нивниот производен процес не смее да има прекин, како и спортските обложувачници кои предупредуваат дека неработната недела за нив ќе значи отпуштање на 30 отсто од вработените и намалени приходи во буџетот.
Од прехранбената индустрија посебно на удар од законското решение за неработење во недела ќе бидат млечната индустрија и производство на пиво и безалкохолни пијалаци.
Од обложувачниците се децидни дека ако се донесе законското решение, нивното работење ќе се загрози со оглед дека преку 70 отсто од прометот се реализира во недела.