Неуспехот на заедничката историско-образовна комисија со Бугарија да усогласи текст за Гоце Делчев, крена тензии на релација Софија-Скопје. Бугарската страна е особено погодена од предлогот на експертите од земјава, Делчев заеднички да се чествува на 7 октомври, ден кога во 1946, Бугарија ги предала моштите на Македонија. Министерката за надворешни работи Екатерина Захариева деновиве имаше повеќе јавни настапи во бугарските медиуми во кои со агресивен тон зборуваше на оваа тема.
Таа во интервју за БТВ вели дека нема компромис со вистината.
– Тоа Гоце Делчев самиот си има кажано што е – Бугарин е. Го напишал десетици пати – рече Захариева.
Таа вели дека целата идеја за македонската нација е создадена на основата на разделување од Бугарија.
За предложениот датум за заедничко чествување, вели дека се работи за едно од најголемите предавства извршени од Бугарската комунистичка партија.
– Тоа е одбивањето за признавање на Македонците за Бугари под притисок на Сталин и Тито, кои не сакаат голема балканска држава, каква што била Бугарија. Под притисок на Сталин, Георги Димитров ги враќа коските, всушност не ги враќа, туку ги испраќа коските во Скопје. Јас кога првиот пат го видов предлогот реков – тоа шега ли е – рече Захариева.
Таа вели дека се надева на побрз напредок на комисијата и во поглед на учебниците во Северна Македонија.
– Бидејќи ако тие продолжуваат да ги лажат нивните деца, нема како да се обидуваме да ги воспитуваме во лажен национализам, тоа за нив не е добро, за нивната иднина. Да, Бугарија нема претензии кон историјата на Северна Македонија по 1944. Никакви немаме. Навистина, секој си тргнал по својот пат. Ние сме државата која прва ги призна. Апсурдно е по толку години, 30 години од промените, да продолжуваат на стариот начин. Да не забораваме дека тоа се 75 години воспитување на тамошните поколенија со лаги – рече Захариева.