Министерката за одбрана Славјанка Петровска, сакајќи да се зачуваат ликот, делото и жртвата на загинатите бранители, започна со постапка за која не е потребна согласност од општините, а ќе овозможи изградба на овие споменици на споменатите локации, соопштуваат од Министерството за одбрана
Министерството за одбрана ја започна постапката за изградба на спомениците на загинатите бранители во месноста Љуботенски Бачила, Карпалак и Вејце.
„Со оглед на обидот на градоначалниците на општините до кои беше поднесена иницијативата да ја политизираат оваа иницијатива, министерката за одбрана Славјанка Петровска, сакајќи да се зачуваат ликот, делото и жртвата на загинатите бранители започна постапка за која не е потребна согласност од општините, а ќе овозможи изградба на овие споменици на споменатите локации“,
соопштија денеска од Министерството за одбрана.
Со заклучок на седницата на Владата одржана на 28.9, Владата ги задолжи Министерството за одбрана и надлежните институции, местата на кои загинале македонските бранители да му бидат доделени на Министерството за одбрана.
Постапката е веќе започната и е во тек, посочуваат од ресорното министерство.
Инаку, Министерката за одбрана Славјанка Петровска пред еден месец изјави дека очекува одговори од општините во врска со иницијативата за поставување споменици на загинатите бранители кај Вејце, Карпалак и Љуботенски Бачила, и порача дека од овој настан не сака да прави медиумска атракција ниту да го користи за популистички цели.
„Ако кој било од градоначалниците смета дека иницијативата е неправилно поднесена, се разбира може во писмена форма да одговорат, а јас како министерка добро знам која ќе биде следната фаза за реализацијата на оваа идеја,“
истакна тогаш министерката.
Таа дополни дека ги чека одговорите од надлежните општини, согласно Законот за меморијалните споменици и спомен-обележја.
„Не е идејата ниту да се надмудруваме ниту да создаваме дополнителни конфликти, затоа што во државата, и на централно и на локално ниво, граѓаните очекуваат од нас да ги решаваме проблемите за кои сме поставени, а не да креираме нови проблеми,“
нагласи Петровска.