Властите кои криеја информации ја заробија државата. Од 2017 година ги отворивме институциите, ги декласифициравме податоците за трошењата и почнавме да објавуваме серија документи и податочни сетови. Со тоа Владата на С Македонија која во 2016 година беше на последно место, веќе три години по ред е прва по отвореност во регионот.
Ова го вели премиерот Зоран Заев по повод Светскиот ден на слободата на медиумите. Тој додава дека недозволиво е институциите да кријат информации од граѓаните.
„Порано се правеше сѐ да се скрие од медиумите, а денес службите на министерствата прават сѐ да обезбедат точна, сеопфатна и навремена информација. Можеме уште да се подобруваме и ќе се подобруваме, не смее да остане ниту една институција во Северна Македонија со старите навики на затвореност и криење податоци. Брзиот проток на точни информации е гаранција дека медиумите работат слободно. Дека состојбата со медиумите од 2017 постојано се подобрува потврдува и годинешниот извештај за слободите на ‘Фридом Хаус’ во кој се нотира дека во Северна Македонија расте бројот на критички и независни медиуми особено на онлајн платформите, а најважен индикатор во извештајот на ‘Репортери без граници’ е што од 2017 имаме постојан позитивен нагорен тренд, што не беше случај со минатата Влада“,
вели Заев.
Во неговата објава на Фејсбук, се додава дека Владата ќе продолжи да ја унапредува двонасочната комуникација со медиумите како еден од примарните владини комуникациски принципи.
„Премиерот, министрите, владините претставници, прес-службите, сите кои сме во контакт со медиумите, постојано мораме да ја подобруваме комуникацијата, да одговараме на сите прашања, точно и навремено. Тоа е наша обврска кон демократската јавност, но во исто време и нашето најсилно оружје во борбата со дезинформациите. Денес кога македонското здравството и сите граѓани се бориме со глобалната пандемија ковид-19, точните информации се во постојана борба со лажните вести. Апелирам да се вложиме сите во навремено, точно и масовно информирање и да се спротивставиме на дезинформирањето кое има цел да создава лажна слика, да плаши и да крева паника и да ги носи граѓаните до опасност“,
вели Заев.