Не успеавме денеска да постигнеме договор, бидејќи Христијан Мицкоски се плаши од изборно соочување, рече лидерот на владејачката партија СДСМ, Зоран Заев, во вечерашното онлајн-гостување на ТВ Канал 5.
„Здравјето на граѓаните е пред сè. Ние сме парламентарна демократија и Собранието мора да функционира и да има политичка влада која ќе носи храбри одлуки. Во вакви околности кога немаме договор, остануваат термините, односно 22 дена од завршување на вонредната состојба да се одржат избори. Вонредната состојба завршува на 30 мај, на 21 јуни се изборите. Прашањето не е што сакаме, кога нема договор во секоја земја останува закон и владеење на правото. Мора да се почитуваат законите, а законот вели изборите се на 21 јуни“,
рече Заев.
Тој додаде дека процесот може да се одложи доколку се продолжи вонредната состојба, но за таа да продолжи мора да има сериозен аргумент.
Заев смета дека од опозициската ВМРО-ДПМНЕ се исплашени од граѓаните и бегаат од изборно соочување, затоа што, како што рече, се свесни за нискиот рејтинг, но тоа не смее да биде причина државата да остане без институции со полн легитимитет.
„Изборите се веќе распишани, парламентот е распуштен, кандидатските листи се поднесени и прифатени, имаше и ждрепка за бројките на гласачкото ливчче. Според нас, опозицијата не е подготвена и има страв од избори, затоа што бројките на рејтинзите тоа го покажуваат. Јасно им е и ним дека ние победуваме со убава разлика, но тоа не е причина да ја заглавиме државата, да биде без институции, а ќе бидат потребни заради здравјето на граѓаните и заради економијата и заради демократијата“,
рече Заев.