Во врска со декларација од Македонци во Бугарија, кои бараат „да се запре со непринципиелните компромиси со Софија“, Заев истакна дека ниту е европски, ниту е исправно да се мешате во внатрешните работи на другите земји
Премиерот Зоран Заев повтори денеска дека ниту тој, ниту ЕУ добила гаранции од Бугарија, на самитот во Брдо во Словенија, за деблокирање на процесот за членство на земјава во Унијата, потенцирајќи работните групи на двете земји, сепак, продолжуваат да работат и оти е можно да се најде решение доколку двете страни тоа го сакаат.
„Реков дека ние од Бугарија не добивме гаранции за време на словенското организирање на Самитот ЕУ – Западен Балкан, ниту, пак, ЕУ доби гаранции. Пораките беа јасни и верувам дека претседателот Радев ги сфати. Билатерални работи треба билатерално да седнеме и да ги решаваме. Работните групи продолжуваат да работат. Верувам дека би дошле до усогласени текстови, затоа што тоа се решливи прашања односно ќе кажам едноставно е, дека краткото име е исто со долгото име, Северна Македонија е исто со Република Северна Македонија, дека немаме територијални претензии спрема ниту еден од соседите. Секако, немаме територијални претензии спрема Република Бугарија, рече Заев во одговор на новинарско прашање на прес-конференција во Владата.
Верувам, нагласи Заев, дека ќе се изнајде решение доколку се сака, односно доколку тоа го сакаат двете страни.
„Ако едната страна сака и понатаму да блокира и да го прави тоа, тоа останува на неа. Дефинитивно, нам ни треба поддршката од Бугарија, таа е еден од нашите први соседи, источен сосед. Често, покрај пријатели, се нарекуваме и браќа, а браќата си помагаат меѓу себе, не наоѓаат начини и прични како да се блокираат. Бугарија е членка на ЕУ и ЕУ без една земја не може да донесе одлука, но убеден сум дека разумноста на политичарите надвор од изборни процеси, во мирни води, во постабилно време ќе преовлада и ќе надвладее, за да можеме да испишеме убава историја, што ќе им ја оставиме на идните генерации“,
истакна Заев.
На прашање за декларација од Македонци во Бугарија, кои бараат „да се запре со непринципиелните компромиси со Софија“, Заев истакна дека ниту е европски, ниту е исправно да се мешате во внатрешните работи на другите земји.
„Ние треба да го правиме она што го прават сите други земји, секогаш кога се јавуваат граѓани во други земји, а тоа е апелирање за почитување на меѓународните договори за сите и секогаш правата да ги бараат пред Европскиот суд за човекови права во Стразбур. Не е европски, ниту е добрососедски, ниту е пријателски ние да се инволвираме во тоа што се случува во Бугарија, ниту пак сакаме некој да се инволвира кај нас“,
рече Заев.
Тој додаде дека и нашиот Устав вели дека земјава не треба да се меша во внатрешните работи на другите земји. Тоа, нагласи, го кажува и Договорот за добрососедство, пријателство и соработка каде исто така е преземена обврска за немешање во внатрешните работи на Бугарија.
На прашање дали ЕУ или Германија како земја членка ќе преземат нешто во врска со декларацијата со која се бара да не се дозволи злоупотребата на членството во ЕУ за негирање на македонското национално малцинство во Бугарија, германската амбасадорка во земјава, Анке Холштајн, изјави денеска дека на билатералните прашања не им е место во процесот на пристапување во Унијата.
„Мислам дека во изминативе денови јасно беше покажано дека билатералните прашања немаат место во пристапниот процес. Тоа треба да се следи и во поглед на малцинствата“,
рече амбасадорката.