Премиерот, во интервју на Канал 5, рече дека се намалува стапката на заразени од ковид-19 во земјава, како и факторот на преносливост, додека опозицискиот лидер, во гостување на Алфа, оцени дека, додека Владата да набави вакцини, го загрозува здравјето на граѓаните
Вакцините против коронавирусот во земјава ќе пристигнат најверојатно во март следната година, најави вечерва на Канал 5 премиерот Зоран Заев, посочувајќи дека државата има издвоено средства за набавка на вакцини.
Но, потенцира, ако станува збор за донација, тогаш ние со задоволство ќе ја прифатиме без разлика од некоја држава или пак од ЕУ. Тој истакна дека се обезбедени и соодветни фрижидери за чување на вакцините.
Ќе се води и јавна кампања за потребата од вакцинирање за да се вакцинираат поголем број граѓани и да се стопира ширењето на коронавирусот, но потенцира дека останува забраната за владино рекламирање во медиумите, освен за јавни кампањи од општествен интерес.
Вакцината, нагласи тој, нема да биде задолжителна, бидејќи секој граѓанин има право да одлучува за себе. Приоритети во вакцинирањето, рече, ќе имаат здравствените работници, хронично болните и повозрасните лица.
Во врска со најавата за донација на вакцини од Бугарија, Заев нагласи дека е во ред и човечки кога некој, во случајов нашата соседна земја, ви подава рака да ја прифатите.
„Ние сме пријатели во регионот. Актот на донирање е акт на донирање. Овде не се работи дали може да си купиме или не. Ние имаме пари во буџетот, за тоа сме предвиделе средства. Нема поважно прашање од здравјето на граѓаните. Ова е понудено како донација, како што ни понуди и Грција, и други европски земји, ЕУ… Затоа ја прифативме, затоа што во спротивен случај не би се однесувале пријателски кон Бугарија“,
истакна Заев.
Тој рече дека ширењето на коронавирусот во земјава е забавено и апелира граѓаните да продолжат да ги спроведуваат мерките. Намален е рече и факторот на преносливост и сега е 0.92. Треба, рече, да се внимава додека не стигнат вакцините со кои би можел да се изгради колективен имунитет и животот полека да почне да се враќа во нормала.
За вакцинацијата против ковид-19 зборуваше и лидерот на ВМРО-ДПМНЕ Христијан Мицкоски, во гостување на Алфа, оценувајќи дека јавноста сака да знае кога ќе стигнат вакцините. Мицкоски во своето гостување посочи дека основна задача на една влада, на оние кои, како што рече, земаат плата за тоа, е да обезбеди вакцини меѓу првите, а не последна. Тој додаде дека, додека Владата во земјава да набави вакцини, го загрозува здравјето на граѓаните.