Иницијативата на ВМРО-ДПМНЕ за предвремена ратификацијата на Протоколот за НАТО во Собранието, премиерот Зоран Заев ја нарече политичка калкулација и ги праша пратениците од опозицијата каде биле кога во Собранието се носеле важните стратегиски одлуки за земјата.
„Не треба да бидете од некоја голема партија, може да бидете и од мала и како граѓанин да знаете дека за предлог за ратификација доставува Владата до парламентот. Политичките партии сега ова го користат исклучиво за нивно калкулантство. Каде беа тие кога требаше да се донесат големите одлуки за да можеме да бидеме членка во НАТО. Беа повлечени надвор од сите преговарачки процеси, избегнуваа да донесат храбри одлуки, стоеја над пратениците кои дефинитивно ги поддржаа ваквите историски одлуки во Собранието, по 27 години да ги решиме крупните проблеми за да бидеме конечно членка на НАТО“, изјави денеска Заев одговарајќи на новинарско прашање.
За Заев не е спорно да има условна ратификација, но, како што рече, сепак треба да се почека ратификацијата од Шпанија за постапката да биде без какви било политички калкулации.
ВМРО-ДПМНЕ вчера излезе со иницијатива законот за ратификација на Северноатлантскиот договор и на Пристапниот протокол за членство да бидат ратификувани однапред, пред да заврши процедурата кај земјите членки. Се повикуваат на случајот со Црна Гора во 2017 година, кога парламентот во Подгорица предвремено ги ратификуваше овие документи, а ратификациите во Холандија и Шпанија се случија еден месец подоцна.
Тие бараат од претседателот на Собранието, Талат Џафери, најбрзо што може да ја испрати иницијативата до Владата.
Но, Џафери смета дека Владата, а не Собранието, е надлежна за постапување на ваква иницијатива.
За претседателот Стево Пендаровски не е спорно Протоколот да се ратификува и по изборите, по конституирање на новиот собраниски состав. За предлогот на опозицијата за условна ратификација, Пендаровски смета дека сè уште има правни дилеми дали тоа би било правно издржано.