Изразена благодарност за хуманитарната и финансиската поддршка од ЕУ за надминување на пандемијата со ковид-19 и цврста определба на Владата за интеграција во Европската Унија како стратегиска цел на земјата
Премиерот Зоран Заев, на денешната работна средба со евроамбасадорот во земјава Дејвид Гир, изрази благодарност за хуманитарната и финансиска поддршка од ЕУ за надминување на пандемијата со ковид-19 истакнувајќи ја цврста определба на Владата за интеграција во Европската Унија, како стратегиска цел на земјата.
„Следејќи ги препораките содржани во извештајот на Европската комисија за 2020 година, Владата прави силни напори да ги зајакне домашните ЕУ-реформи на ефикасен и инклузивен начин“,
истакнал Заев на средбата, притоа изразувајќи благодарност за планот за економски инвестиции усвоен од Европската Унија, кој ќе биде силен сигнал за посветеноста и поддршката на ЕУ за економскиот напредок на регионот на Западен Балкан.
Во соопштението од владината прес-служба, врз основа на заедничката изјава, Заев и амбасадорот Гир се согласиле дека треба да се направат сите напори за операционализирање на историската одлука на Европската Унија за отворање преговори со Северна Македонија, со цел одржување на првата меѓувладина конференција до крајот на 2020 година за време на германското претседателство со ЕУ.
Амбасадорот Гир ја истакнал важноста на постојаните напори за решавање на отворените билатерални прашања и ја поздравил заложбата на Владата да продолжи да напредува во спроведувањето на реформите поврзани со Европската Унија, во интерес на сите граѓани, но и важни за приближување кон ЕУ.
На средбата е разговарано и за резултатот од Самитот на Берлинскиот процес, на кој Северна Македонија беше кодомаќин со Бугарија на 10 ноември, при што амбасадорот Гир ги поздравил преземените обврски за воспоставување заеднички регионален пазар заснован на принципите на единствениот пазар на ЕУ – слобода на движење на капитал, стоки, лица и услуги, при што беше истакнато дека овие активности ветуваат значителни придобивки, кои ќе произлезат од поголема интеграција во рамките на Западен Балкан и во ЕУ.