По изјавата на Али Ахмети дека е време за прв премиер Албанец на земјава, лидерот на СДСМ Зоран Заев во изјава за ТВ 21 вели дека премиер ќе биде оној кој ќе добие поддршка, а не според етничката припадност.
„Во нашата земја мандатар за претседател на Влада може да биде секој граѓанин кој ќе обезбеди поддршка од најмалку 61 пратеник. Според Уставот, пратениците во Собранието се бираат според волјата на граѓаните, а не според етничката припадност на еден или друг кандидат“,
вели Заев.
Според него, граѓаните во нашето општество сè повеќе ги надминуваат етничките бариери, но поважно од тоа е дека при изборот тие се водат пред сè од квалитетите на кандидатот и посебно од неговиот однос кон граѓаните, од неговата општествена посветеност за поволност на сите граѓани и државата, како и личниот пример што како впечаток кандидатот го остава пред граѓаните.
„Доколу СДСМ победи на изборите, јас сум кандидатот за претседател на Влада и ќе бидам премиер кој еднакво се бори за подобар живот на сите граѓани на Северна Македонија, нешто што го докажав низ сите мои политики изминативе години. Соодветно на тоа, доколку ДУИ има ваков услов за коалиција за Влада тогаш ДУИ нема да биде дел од идната Влада“,
вели Заев.