Во изминатите три години покажавме дека со СДСМ, ЕУ и НАТО станаа реалност. Од другата страна, со ВМРО-ДПМНЕ возможна е само обнова на режимот, порача денеска лидерот на СДСМ, Зоран Заев.
„По цела деценија стагнирање, денес Северна Македонија е 30. земја членка на НАТО и имаме одлука со која наскоро започнуваме преговори за членство во ЕУ. Членството во НАТО значи дека нашите граници се трајно обезбедени, нашата безбедност е загарантирана. Тоа значи и нови инвестиции, нови работни места и повисоки плати за сите. Тоа е пристап на пазар од 4 милијарди евра годишно, пазар за нашите, домашни компании. Влеговме во НАТО, можеме и во ЕУ. Членството во НАТО е влезница за ЕУ. Оваа година целосно заслужено почнуваме преговори со унијата. Подготвени сме, знаеме и можеме, со новата Влада предводена од СДСМ до 2024 да отвориме 80% од поглавјата за интеграција во ЕУ“,
порача Заев.
Тоа, како што кажа, ќе овозможи отворање на нови европски фондови за справување со кризата и последиците од неа, како и за капитални инвестиции.
Заев ги повика граѓаните на 15 јули да излезат и да гласаат, посочувајќи дека со опозициската ВМРО-ДПМНЕ, како што вели, државата ќе се врати назад.
„ Добро знаеме дека ВМРО-ДПМНЕ и Мицкоски немаа став за ниту едно прашање, важно за државата и граѓаните, дека бегаа од одговорност и постојано блокираа и кочеа. Мицкоски не собра храброст ниту да даде аплауз на денот на ратификацијата на членството во НАТО во македонското Собрание. И ден-денес тие се закануваат дека ќе ја вратат државата чекор назад, назад во изолација, дека ќе го вратат назад режимот. На 15 јули ќе ја потврдиме разликата. Од едната страна е членството во НАТО, од другата страна е белата барокна палата. Од едната страна се Брисел и преговорите со ЕУ, од другата страна се Хунзите, Белизе и Субрата Роj. СДСМ нуди кадри кои земјата ја однесоа на прав пат, ВМРО-ДПМНЕ ги нуди луѓето на Груевски“,
рече Заев.