Медиумското рекламирање е консеквентен дел од работењето на политичките партии. Сега СДСМ од сопствени пари, од сопствена сметка склучува договор по официјални ценовници што ги нудат медиумите за медиумски закуп и чесно од сметка на партијата си плаќаме, рече премиерот Зоран Заев во одговор на пратеничко прашање за медиумската кампања на социјалдемократите која може да се забележи на националните телевизии деновиве.
Медиумското рекламирање, потенцира тој, е целосно покажување на економските успеси на СДСМ.
Според Заев, парите што ги троши СДСМ за медиумско рекламирање не се поголеми од 10 до 15 проценти од годишното финансирање што го имаат. Со дел од парите, пак, посочи премиерот, социјалдемократите ги покриваат трошоците за вработените во партијата.
„Во минатото ВМРО-ДПМНЕ не плаќаше, освен за време на избори. Меѓу избори никогаш од партиска сметка не платила за своите реклами, а беа постојано присутни. Десетици милиони евра државни, буџетски пари се потрошија за промоција на политиките на ВМРО-ДПМНЕ“, рече Заев.
Кога започна кампањата на националните телевизии, „360 степени“ упати прашања до партијата за тоа колку чини рекламирањето и од кои пари се покрива. Оттаму посочија дека трошат сопствени средства, станува збор за мали суми, но не одговорија со конкретна бројка посочувајќи да почекаме да заврши кампањата и ќе излезат со прецизна информација за трошоците.