Отворањето на пристапните преговори за членство во ЕУ останува наш стратешки приоритет и потенцирам, она што верувам е јасно и за Брисел, дека билатералните прашања немаат место на преговарачката рамка, кажа премиерот Зоран Заев на заедничката прес-конференција со помошник-државниот секретар на САД, Филип Рикер. Премиерот Заев најави дека ќе продолжи да се бара начин за надминување на спорот со Бугарија.
„Северна Македонија нема да отстапи од изнаоѓање на заеднички прифатливо решение со Република Бугарија, засновано врз европски вредности и стандарди. Посветени сме да работиме со добра волја на имплементација на Договорот за пријателство и добрососедство, во сите области од заеднички интерес, вклучително и на Комисијата за историско – образовни прашања. Но, има некои прашања за кои навистина не може да се преговара. Брисел треба чесно да се соочи со ситуацијата во која е ставена стратешката определба за натомошно проширување на Унијата со земјите од Западен Балкан и да смогне сили да го објави тоа решение до Самитот на ЕУ за Западен Балкан кој ќе се одржи оваа есен. Ја имаме поддршката на САД во овој поглед и тоа е од огромна важност. Сега повеќе од кога било едногласни сме дека унапредувањето на регионалната соработка е неминовна за европеизација на Балканот“,
рече Заев.
Премиерот посочи дека за Западен Балкан од исклучителна важност е најавата на претседателот на САД, Џо Бајден за враќање на силно присуство на САД на светска сцена со ангажирана дипломатија.