„Ние продолжуваме да работиме на изнаоѓање решение со Бугарија за проблем за кој дури не знаеме што е суштината на крајот, но ние сме пријателски земји и веруваме дека треба да си помагаме меѓу себе и да одиме напред за целиот Балкан да стане дел од Европската Унија, изјави денеска премиерот Зоран Заев од Пустец, Албанија.
Тој повтори дека проблемот настанал со краткото име на нашата држава, Северна Македонија, и уште еднаш појасни дека тоа воопшто не се разликува од она што значи Република Северна Македонија, како и дека земјава во повеќе наврати потврдила дека нема територијални претензии, ниту кон Бугарија ниту кон било која друга држава.
„И го решивме на начин на кој што тоа го решаваат европски земји, но за жал проблемот не е отстранет, работиме на тоа како и на отстранување на омразата, работиме на решавање и на други прашања како што е динамиката на имплементирање на Договорот за пријателство, изградбата на инфраструктурата, историските личности. Можеби Договорот за пријателство, соработка и добрососедство со Бугарија не се реализира беспрекорно, но се реализира добро. Ако ја немаше корона – кризата, ако не беа изборите веројатно ќе беше уште подобро, но се надевам многу брзо ќе изнајдеме решение“, рече Заев.
Одговарајќи на новинарско прашање, дали Северна Македонија ќе попушти во спорот со Бугарија, Заев повтори дека ниту се разговара, ниту се преговара за македонскиот идентитет.
„Првото за што се отвори дискусија во нашата земја и веројатно во целиот Балкан е дека се разговара за македонскиот идентитет и за македонскиот јазик, но уште еднаш да повторам и да потврдам дека ниту се разговара, ниту се преговара за тоа, бидејќи никаде во светот не се разговора и не преговара за македонскиот идентитет. Впрочем и бугарската страна јавно ја признава реалноста за постоење на македонскиот јазик и македонскиот идентитет, и затоа ниту никој бара, ниту има потреба да попуштаме во нешто. Воопшто не се разговара за тоа“,
изјави Заев.
Премиерот Заев и министерката за образование и наука Мила Царовска, денеска беа во посета на Општина Пустец, Мала Преспа во Албанија, каде со нивните домаќини, Васил Стерјоски, пратеник во албанскиот Парламент од партијата Македонска алијанса за европска интеграција (МАЕИ) и градоначалникот на Општината, Пали Колефски го посетија заедничкото основно и средно училиште „Митре Колефски и Трајан Ѓоргијовски“, каде беше потврдена донацијата од Владата обезбедена преку македонски компании за поддршка на инфраструктурното уредување на училишниот двор и дворот на градинката.
Денеска беа реализирани 15 000 евра од вкупно 30 000 колку што е донацијата, додека останатите средства ќе се донираат во февруари следната година.