Ако сакаме швајцарски плати, треба да работиме многу повеќе од таа продуктивност што денеска ја имаме, вели премиерот во контекст на предлогот за скратено работно време на администрацијата
Ефикасноста на администрацијата е проблем и тоа мора да биде во нашиот фокус, вели премиерот Зоран Заев коментирајќи го предлог-законот за администрацијата кој предвидува скратено работно време за администрацијата во петоците.
Заев вели дека ова било предизборно партиско ветување, но не е конечно решение и дека додека предлогот е поставен на ЕНЕР за коментари граѓаните може да се изјаснат дали се за или против ваквото решение.
„Ги знаете моите ставови и за севкупната продуктивност на населението и севкупната продуктивност и ефикасност на администрацијата. Како народ, треба повеќе да работиме, а не помалку. Но, како ветување предизборно на политичките партиципиенти во власта тоа е ставено на ЕНЕР и допрва ќе се отвора дискусија за ова прашање. Верувам дека граѓаните ќе си кажат тоа што е реалноста во државата, а реалноста е дека сите, ако сакаме швајцарски плати, треба да работиме многу повеќе од таа продуктивност што денеска ја имаме, почнувајќи од себе, па секако до сите работници во приватниот и во јавниот сектор“,
вели Заев.
Тој спомена дека во почетокот на ковид-кризата, кога администрацијата работеше со 38 отсто од капацитетите, се покажало дека системот функционира, што значи дека административците не се целосно искористени.
„Ефикасноста на јавната администрација е нешто што е сериозен фокус и мора да биде фокус. Видовме дека целиот систем, со 38 отсто од вработените кои одеа на работа за време на претходните бранови на пандемијата, функционираше. Тоа само по себе кажува дека постојните капацитети на администрацијата мора да бидат максимално искористени. Тоа е очекувањето на граѓаните, но кога имате нешто отворено на ЕНЕР, несоодветно е премиерот да каже кои се очекувањата на граѓаните, туку граѓаните да си ги кажат своите очекувања“,
рече Заев.
Тој додаде дека бројот на вработени во администрацијата во 2016 година бил 165 000, а сега е 132 000.
„Најголем дел од администрацијата е во јавните државни или комунални општински претпријатија, без полицијата во униформа, без здравствениот систем на доктори, медицински сестри, болничари и без армијата, некаде околу 15 000 луѓе работат во министерствата, работат многу во енергетските и железничките компании, во патишта и во другите јавни претпријатија, како и во водовод, чистота, во комуналните претпријатија. Треба да направиме дополнителна рационализација на администрацијата. Ние продолжуваме со тој дел“,
рече Заев.