Во придружното писмо, со кое премиерот Христијан Мицкоски го испраќа предлог-законот до парламентот, може да се прочита дека Владата го утврдила текстот на предлог-законот на седницата одржана на 3 септември, пред точно една седмица
Предлог-законот за задолжување на Република Северна Македонија од 500 милиони евра кај Унгарската експорт-импорт банка стигна во Собранието. Владата предлага овој акт да се носи по скратена постапка.
Во придружното писмо, со кое премиерот Христијан Мицкоски го испраќа предлог-законот до парламентот, може да се прочита дека Владата го утврдила текстот на предлог-законот на седницата одржана на 3 септември, пред точно една седмица.
Со предлог-законот во Собранието е испратен и текстот на договорот за заем што треба да го склучат Република Северна Македонија, претставувана од министерката за финансии Гордана Димитриеска-Кочоска и Унгарската експорт-импорт банка.
Во предлог-законот, меѓу другото, се наведува:
- Заемот од членот 1 од овој закон ќе се повлече во една транша;
- Рокот за отплата на заемот од членот 1 од овој закон е 15 години, со вклучен грејс-период од три години;
- Каматната стапка е фиксна и изнесува 3,25%;
- Република Северна Македонија ќе ѝ плаќа на Унгарската експорт-импорт банка приватно друштво со ограничена одговорност провизија за неповлечени средства во висина од 0,5% од заемот на годишно ниво;
- Провизијата за неповлечени средства ќе се пресметува на дневна основа на неповлечениот дел од заемот, пресметано од датумот на достапност на средствата и ќе се плати првиот работен ден по завршување на периодот на достапност;
- Заемот од членот 1 од овој закон ќе се отплаќа на 24 полугодишни рати, на 15 февруари и 15 август секоја година.
Во образложението на предлог-законот се наведува и: „дополнително, Република Северна Македонија ќе ѝ плати провизија за извршени правни услуги на независна фирма избрана од страна на Унгарската експорт-импорт банка, приватно друштво со ограничена одговорност. Провизијата за извршени правни услуги ќе се плати пред повлекување на траншата.“
Владата соопшти дека половина од заемот ќе биде наменет за финансирање проекти за општините во земјава, а половина ќе бидат пласирани како поволни кредити за приватните компании.
Веста дека Унгарија ќе ѝ позајми половина милијарда евра на Северна Македонија беше соопштена по средбата на премиерите Виктор Орбан и Христијан Мицкоски на 11 јули во Вашингтон на маргините на Самитот на НАТО.
„Имајќи предвид дека воспоставуваме специјална економска соработка, тоа ќе подразбира дека во иднина кога ќе има потреба од такво нешто, ќе можеме повторно да се обратиме до нашиот специјален економски партнер, а тоа е унгарската влада, и да побараме дополнителна поддршка што ќе биде потребна за македонската економија“,
рече Мицкоски во видеообраќање по средбата.
Инаку, на 26 јули годинава, „Политико“ објави дека Унгарија позајмила една милијарда евра, што е најголем заем досега на Будимпешта, од три кинески банки оваа пролет. Кредитот од Кинеската банка за развој, Експорт-импорт банката на Кина, како и од унгарската испостава на Банката на Кина, е целосно повлечен на 19 април годинава, а мора да се врати за три години. „Политико“ наведе дека властите во Будимпешта не ја објавиле информацијата. Таа првпат беше обелоденета од бизнис-изданието „Портфолио“, а потоа потврдена од владината агенција задолжена за долгот.
„Политико“ додаде дека јавниот долг на Унгарија е на рекордно високо ниво од 140 милијарди евра (73,5 отсто од БДП), а буџетскиот дефицит е 6,7 отсто од БДП, па Будимпешта има очајна потреба од готовина. Во такви околности, Орбан реши да ѝ позајми половина милијарда евра на Северна Македонија.
Информациите од Будимпешта за заем од една милијарда евра од Кина дојдоа во период кога премиерот Христијан Мицкоски најави заем од половина милијарда евра од Унгарија. Поточно, првичните информации беа дека позајмицата ќе изнесува една милијарда евра, колку што е и унгарскиот кредит од Кина, а Мицкоски ги пласираше на 9 мај или дваесет дена откако Унгарија го зела кредитот од Кина.