Есенскиот бран на ковид-19 е тука и може да се очекува влошување на ситуацијата, иако состојбата во земјава е се уште стабилна, рече министерот за здравство
Три нови мерки за заштита од ковид-19 ќе ѝ предложи министерот за здравство Венко Филипче на Владата, по препорака на Комисијата за заразни болести.
Првата мерка, како што соопшти Филипче на денешната прес-конференција, предвидува забрана за масовни семејни собирања. Едно семејство ќе може да прими најмногу четворица гости.
Втората мерка е забрана за групирање на повеќе од четири лица на отворен и во затворен простор, по 22 часот.
Третата мерка предвидува носење заштитна маска или покривка на лицето и при престој на отворено, дури и кога лицето се движи само, како и во затворени простории. Исклучок, кога не мора да се покриваат устата и носот, е при спортување, за деца до шест години, при транспорт во приватно возило со членови на семејството, при седење во угостителски објекти (со почитување на протоколите), како и ако лицето е само во канцеларија.
„Есенскиот бран на ковид-19 е тука и може да се очекува влошување на ситуацијата, иако состојбата во земјава е сѐ уште стабилна“,
рече Филипче објаснувајќи зошто ги предлага дополнителните мерки и посочувајќи дека очекува граѓаните да бидат свесни и совесни.
За овие мерки да стапат на сила, треба да ги одобори Владата. Министерот рече дека ќе бара што поскоро да се одржи владина седница и истите да се донесат.
Претходно, Филипче ја соопшти најновата статистика за ситуацијата со ковид-19 во земјава, така што во последното деноноќие е постигнат нов неславен рекорд со 364 нови случаи.
Како што рече Филипче, не се исклучуваат нови препораки , како ограничување на движењето (полициски час) или ограничување на работното време на угостителските објекти, доколку се наметне таква потреба во наредниот период. Како што рече, тоа не мора да биде на целата територија на државата, туку може да се направи и на локално ниво.