Законот за заштита од дискриминација одново се враќа во Собранието откако Уставниот суд еднаш го поништи бидејќи не бил донесен со потребното мнозинство
Пратениците да покажат дека немаат намера да го окупираат новото тело за заштита од дискриминација со партиски кадри, порачаа денеска невладините организации на јавната расправа за законот за спречување и заштита од дискриминација.
„Бараме Собранието да го усвои амандманот на членот 18 што го предложивме. Него го прифати Министерството за труд и социјална политика, а Владата го одби. Бараме оваа грешка да биде коригирана со дејствувањето на пратениците, односно тие да го предложат и да го усвојат. Со него се уредува изборот на членовите на комисијата за заштита од дискриминација, со цел да се осигураме дека ќе има транспарентна постапка, со која ќе се изберат професионалци, а не партиски луѓе. Претходниот состав на Собранието не ни успеа да избере членови на комисијата за заштита од дискриминација. Објавија два огласи, не не известија зошто се поништија, дури политичарите дадоа изјави дека не може да постигнат партиски договор. Апелираме сите пратеници да го поддржат амандманот, со што ќе покажат дека немаат намера да го окупираат телото со партиски кадри, туку да овозможат професионалци да ги штитат правата на дискриминираните“,
порача Драгана Дрндаревска од Коалицијата „Маргини“.
Министерката за труд и социјална политика Јагода Шахпаска порача дека комисијата за заштита од дискриминација ќе биде составена од професионалци и тврди дека законското решение ќе биде ефикасно во превенцијата и заштитата од дискриминација.
Таа потсети дека овој закон е и предуслов за европската перспектива на земјата.
„Денеска треба да го отвориме прашањето за усвојување на законот, кој е многу важен, а поради процедурални пропусти беше укинат. Тој е предуслов за отворање на нашата европска перспектива, а пред сѐ е важен за нашите граѓани. Тука се дефинирани сите видови дискриминација и се гарантира еднаквост на правата. Законот регулира и избор на комисијата, тоа е едно независно, ќе го сочинуваат седум професионалци со искуство во полето за човековите права. Изборот ќе биде на јавна расправа во Комисијата за избори и именувања, ќе има сопствен буџет. Важно ни е граѓаните што поскоро да ја добијат оваа комисија, која ќе може да покрене постапка пред прекршочен суд. Оттука ги повикувам пратениците законот да се донесе консензуално“,
порача Шахпаска.
Опозициската ВМРО-ДПМНЕ, пак, најави амандмани во делот на избор на Комисијата за заштита од дискриминација. Велат дека не се противат на донесувањето на ваков закон, туку бараат квалитетно решение.
„Неспорна е потребата од овој закон, но забелешките се концентрирани на: мандатот на членовите на комисијата, забелешките на Венецијанската комисија е дека не треба да има реизбор, туку треба да има флуктуација на луѓе, се плашам од премногу моќ на едно место. Критериумите за избор треба да бидат многу построги, видовите дискриминација не се добро поставени. Но, еве, ова е шансата заради граѓаните да постигнеме консензус, а тоа значи да има разбирање и на амандманите на опозицијата“,
порача пратеничката Гордана Силјаноска-Давкова.
Законот за заштита од дискриминација беше донесен минатата година откако во Собранието влезе со европско знаменце, но во мај годинава беше укинат од Уставниот суд поради тоа што не бил усвоен со потребно мнозинство од 61 пратеник.