Според пратеникот на ВМРО-ДПМНЕ и потпретседател на Собранието, Антонијо Милошоски, добро е што претседателката Сиљановска-Давкова споменала дека Македонија има проактивна улога во изнаоѓањето решение за одблокирање на евроинтегративниот пат, конкретно во разговорите со официјалните претставници во Брисел
Пратеникот на опозициската Левица, Амар Мециновиќ, во својата оцена на говорот на претседателката на државата се осврна на актуелните прашања со загадувањето на животната средина во државата кои, како што кажа, воопшто не биле третирани во обраќањето на Сиљановска-Давкова
Дел од пратениците на владејачкото мнозинство, денешниот годишен говор на претседателката на државата, Гордана Сиљановска-Давкова во Собранието го оценија како издржано образложение на нејзините активности и предизвиците со кои се соочува државата, меѓу другото и во контекст на евроинтеграциите. Од друга страна, пак, нивни колеги од опозициските партии, сметаат дека говорот на шефицата на државата бил полн со флоскули, без да понуди конкретна визија и оти таа, според нив, во своето обраќање само ја поддржала агендата на ВМРО-ДПМНЕ, но не проговорила за општата состојба во која се наоѓаат граѓаните на земјата.
Оценките на партијата што го предводи владејачкото мнозинство, на прес-конференција во парламентот, ги изнесе пратеникот на ВМРО-ДПМНЕ и потпретседател на Собранието, Антонијо Милошоски, кој кажа дека она што треба да се напомене е принципиелниот став на Сиљановска-Давкова, а кој, според него, се совпаѓа со мислењето на мнозинството граѓани на Македонија, дека наша стратегиска определба се европските интеграции и оти тука немаме дилема околу оваа поставена цел.
Дилемата, додаде тој, е во извесноста на патот до целта, што е обременето со наметнување билатерални прашања надвор од копенхашките критериуми откако претходната влада прифатила големи концесии кои дополнително го компликуваат процесот на евроинтеграциите.
„Во секој случај, ќе се продолжи со сите напори на политички, на дипломатски и на реформски план. Добро е што претседателката Сиљановска-Давкова спомена дека Македонија има проактивна улога – не го констатира само проблемот кој е наследен од претходните влади, туку нуди одредени свои проактивни решенија за изнаоѓање излез од ваквата наследена состојба, конкретно во разговорите со официјалните претставници во Брисел“,
рече Милошоски.
Тој се осврна и на делот од говорот на претседателката на државата, во кој таа кажа дека ќе предложи членови во Судскиот совет откако Собранието ќе го усвои новиот закон за Судски совет, кој е дел од Реформската агенда и кој се очекува парламентот да го донесе пред Нова година.
„Доколку успееме тоа да го завршиме како обврска во Собранието, сметам дека ќе можеме следната година веќе да бидеме сведоци на системско, но и кадровско, човечко реформирање на Судскиот совет којшто е можеби една од институциите која носи поголема одговорност за нискиот рејтинг од само два проценти на вкупното правосудство. И во комбинација со дебата која би се отворила во текот на следната година за изборот на нов државен обвинител, сметам дека можеме да дадеме дополнителна динамика во реформите во целото правосудство“,
кажа пратеникот на ВМРО-ДПМНЕ и потпретседател на законодавниот дом.
Неговиот колега од коалицискиот партнер во владејачкото мнозинство – движењето ЗНАМ, Бобан Карапејовски, изјави дека според него претседателката на државата имала „фантастичен“ говор, кој, додава, можеби политички бил невообичаен.
Според координаторот на пратеничката група на ЗНАМ, Сиљановска-Давкова решила да зборува за хипокризијата на која наидува Македонија во меѓународните односи, што, како што додаде, веројатно е вообичаен составен дел од политиката. Сепак, наведе тој, во говорот на претседателката на државата, била нагласена потребата тоа да се надмине и од една реал-политика да се премине на политика на принципи и политика на докази, во рамките на која тој што постигнал нешто треба да го добие заслуженото место во општеството, но и државата во меѓународните односи.
„Гаранциите за кои таа зборуваше во однос на тоа што треба да го направиме е нешто што е и наш став и наша идеја што таа ја реафирамира во овој момент. Ние сме подготвени да си ја завршиме домашната задача во однос на меѓународниот пат на државата, но сепак со едни силни гаранции дека тоа ќе биде последното нешто што треба да го направиме на тој интеграциски пат. Се надевам дека ќе се најде и политичко решение за нашиот долгогодишен статус на земја кандидат, но се разбира нашата домашна задача останува на што треба да го направиме на тој пат“,
кажа тој.
Карапејовски оцени дека претседателката во духот на она што таа го претставува како избран претставник на сите граѓани, всушност ги сублимирала ставовите што провејуваат во општеството на овој план. Додаде оти се надева дека ќе се направи обид да се изгради национален консензус за прашањата што таа ги отворила во своето годишно излагање.
Пратеникот на опозициската Левица, Амар Мециновиќ, пак, посочи дека говорот на претседателката наместо со визија бил полн со флоскули и ултимативно претставување на годишната агенда на ВМРО-ДПМНЕ, а не на политичката и општествена состојбата на сите граѓани на државата.
Мециновиќ во својата оцена на говорот на претседателката на државата се осврна на актуелните прашања со загадувањето на животната средина во државата кои, како што кажа, воопшто не биле третирани во обраќањето на Сиљановска-Давкова.
„Претседателката спомена дека природните богатства на Република Македонија се заеднички, дека нѝ припаѓаат на сите нас. Тогаш се поставува прашањето чие богатство е Дошница и сите наши реки на кои се ставаат хидроелектрани? Чие природно богатство е воздухот и нашите котлини, каде што се гушат нашите луѓе? Кога претседателот (на државата) се обраќа пред парламентот и не го спомнува уништувањето на локалната животна средина, не успева да го спомне гушењето и труењето на нашите градови, ова изоставање не е неутрално, туку е патоказ дека молкот во овој контекст е индикатор на политика. Преку игнорирање на овие проблеми се сигнализира дека затруениот воздух, контаминираната почва и зголемувањето на стапките на болести на нашите граѓани се прифатени. Нејзиното изоставање на оваа реалност за нашите граѓани е нормализирање на штетата која им се чини секојдневно“,
рече, меѓу другото, Мециновиќ.
Лидерот на СДСМ и пратеник, Венко Филипче, во својот осврт на говорот на Сиљановска-Давкова рече дека таа ја избрала најкорумпираната власт што ја носи Македонија во изолација наместо во Европската Унија.
„Се потврдува тоа што го зборувавме изминатите недели, месеци, се потврдува дека оваа влада, а денеска претседателката даде поддршка, ја води Македонија кон изолација, дека Европската приказна за нас е завршена, нема да има никакви реформи и следи голема криза. Жалам што претседателката не застана на страната на мнозинството граѓани кои сакаат оваа земја да ја видат интегрирана целосно во Европа. Жалам што не застана на патот на вистинските реформи, да ги поддржи, да ги коментира, туку само некои квази реформи, некои делумно изменети закони кои што оваа влада ги претставува како вистинска реформа“,
рече Филипче.
Според него, следува голема криза и посочи дека со поскапувањето на струјата ќе поскапи сè во државата. Укажа дека преговорите во рамките на Социјалниот совет помеѓу Владата и синдикатите практично не дава никаков резултат и оти нема да има поголеми плати ниту за работниците ниту во образованието, ниту во здравството, ниту поместување во делот на социјалните трансфери. Во однос на проблемот со буџетскиот дефицит, Филипче рече дека тој ќе се пополнува со нови задолжувања следната година.
Лидерот на СДСМ го повтори случајот за кој партијата изминатите денови алармира, а кој се однесува на проектот „мигранти за пари“, а кој, како што додаде, претседателката во ниту еден момент не демантирала дека ќе се случи.
Претседателката Гордана Сиљановска-Давкова во нејзиното годишно обраќање пред пратениците, кое траеше повеќе од еден час, повика на национален консензус околу стратегиските цели на државата за евроинтеграциите, посочувајќи дека тие не се само административен процес, туку политички предизвик кој бара уставни измени и јасни гаранции од Европската Унија и од Бугарија.
Таа зборуваше и за трагедијата во Кочани, оценувајќи дека пожарот откри системски пропусти, култура на неказнивост и корупција. Ги повика политичарите да престанат со дневнополитичките препукувања на сметка на судството околу овој процес.