Покрај бесплатните вакцини, започната е и вакцинацијата со комерцијалните вакцини
Над 76 илјади граѓани се пријавени за вакцинација против сезонски грип кај ризичните категории на население, информираат од Министерството за здравство, од каде што додаваат дека повеќе од 43 илјади лица веќе се вакцинирани низ државата.
Министерот за здравство Азир Алиу изјави дека граѓаните сè уште имаат можност да се пријават за бесплатна вакцинација преку апликацијата vakcinacija.mk или преку својот матичен лекар.
„Превентивни тимови продолжуваат и со теренска вакцинација во домашни услови за повозрасни и неподвижни лица, како и за лица со попреченост“,
вели Алиу.
Покрај бесплатните вакцини, започната е и вакцинацијата со комерцијалните вакцини.
Вакцинацијата со комерцијалните дози почна во Центарот за јавно здравје (ЦЈЗ) Скопје. Во текот на оваа недела ќе отпочне вакцинација и во другите центри за јавно здравје низ државата.
Екипите на ЦЈЗ – Скопје вршат вакцинација секој работен ден од 07:30 до 14:30 часот.
Цената на комерцијалните вакцини изнесува 700 денари.