Оттаму велат дека Одлуката на здравствените власти во насока на употреба на ковид-сертификати е разумна и е донесена за општо добро поради пандемијата на коронавирусот, а врз основа на препораките на СЗО
Уставниот суд на денешната седница соопшти оти нема ништо спорно во Одлуката на здравствените власти за употреба на ковид-сертификати и одлучи да не поведе постапка по иницијативата поднесена во насока на оваа одлука од подносителот Николче Марушевски, за кој, меѓу другото, спорно било ограничувањето на движењето.
„Уставниот суд на денешната седница не поведе постапка по иницијативната поднесена на Одлуката на здравствените власти со која се забранува влез во објекти и делови од објекти наведени во одлуката, без поседување и приложување на сертификат/потврда за извршена имунизација од вирусот SARS-CoV-2, односно примена најмалку прва доза од вакцина против заразната болест ковид-19 и сертификат/потврда за прележан ковид-19 во последните 45 дена, сметајќи од денот на оздравувањето“,
стои во соопштението.
Судијата-известител Вангелина Маркудова на седницата рече дека наводите во иницијативата се неосновани бидејќи одлуката на здравствените власти е разумна и е донесена за општо добро поради пандемијата на коронавирусот, а врз основа на препораките на СЗО.
И судијата Дарко Костадиновски се согласи дека одлуката на здравствените власти е разумна, легитимна и е за општото здравје на граѓаните.