Независните здруженија реагираат на изјавата на премиерот Христијан Мицкоски во која тој рече дека за влез во Бундестагот на Германија се потребни пет проценти. Коментирајќи ја неговата изјава, независните реагираат дека премиерот свесно или од недоволна информираност го меша прагот на освоени гласови на парламентарните избори за влез во германскиот парламент со прагот на потребни потписи кои се бараат во Германија за граѓани да може воопшто да се кандидираат на избори
Да се тврди дека зголемувањето на прагот за независни кандидати е во корист на граѓаните е навреда за нивната интелигенција. Тоа е како да им ги затвораш вратите, па да им објаснуваш дека така полесно ќе влезат.
Ова е дел од реакцијата на независните граѓански иницијативи во врска со денешната изјава на премиерот Христијан Мицкоски, во која, прашан за негодувањето на независните за предложеното зголемување на прагот на потписи кои треба да ги соберат за нивно учество на изборите, рече дека се носат најдобри решенија кои одговараат на потребите на граѓаните, а не на поединци или на одредени невладини.
„Да речеме во Германија, за да се влезе во Бундестагот потребни се пет проценти. Во други држави по три-четири, некаде и пет проценти. Видете, може да се појави некој што не е задоволен. Демократијата е таква да не можеме ние да забраниме задоволство или незадоволство. Ги прифаќаме тие пораки, ги анализираме и носиме најдобри решенија коишто одговараат на потребите на граѓаните, а не на поединци или на одредени невладини“,
рече премиерот Мицкоски во одговор на новинарско прашање по посетата на „Македонско село“.
Коментирајќи ја неговата изјава, независните реагираат дека премиерот свесно или од недоволна информираност го меша прагот на освоени гласови на парламентарните избори за влез во германскиот парламент со прагот на потребни потписи кои се бараат во Германија за граѓани да може воопшто да се кандидираат на избори.
„Премиерот денеска вели дека во Германија за да се влезе во парламентот се потребни 5 проценти, но не кажува дека тоа се однесува на процентот од освоени гласови на избори. Премиерот не кажува и дека за да може граѓански листи да се кандидираат на избори во Германија треба да соберат само 200 потписи. Што значи дека со само 200 собрани потписи граѓански иницијативи може да се кандидираат на парламентарни избори во Германија и ако притоа освојат најмалку 5 отсто од гласовите, тие ќе добијат место во Бундестагот“,
се наведува во реакцијата на граѓанските здруженија.
Оттаму потсетуваат и на изјава на Мицкоски дадена во август 2021 година, кога тој се уште беше предводник на опозицијата, во која вели дека за ВМРО-ДПМНЕ е прифатлив и праг од еден отсто или воопшто да нема праг во однос на поднесувањето потписи за независните кандидатски листи за претходните локални избори.
„Измените кои Мицкоски и останатите партии во Собранието се обидуваат да ги протуркаат се уште поекстремна верзија на противуставните измени укинати од Уставниот суд. Независните кандидати се директен глас на граѓаните – секое административно отежнување на нашата кандидатура е удирање по основното право на избор и претставеност. Зголемувањето на прагот не е услуга, туку бариера. И секој што тврди спротивно е уплашен од вистински плурализам. Нема да се откажеме и ќе се бориме до крај. Колку повисоки прагови поставувате, толку повисоко ќе прескокнеме!“,
додаваат независните во писмената реакција.
Во прилог на реакцијата, независните објавија и листа на европски држави и бројот на потписи кои независните кандидати треба да ги соберат за да учествуваат на избори во секоја од државите.