Бугарскиот шеф на дипломатијата,Светлан Стоев, пак, на прес-конференција со хрватскиот колега, рече дека до крајот на октомври ќе има нов круг консултации меѓу Бугарија и Северна Македонија и доколку се постигне согласност, она што ќе биде договорено, може да биде потпишано од двајцата министри за надворешни работи
Бугарскиот претседател Румен Радев ги оценил како алармантни случаите на дискриминација и системско кршење на човековите права на граѓаните на Република Северна Македонија кои имаат бугарски идентитет, соопштија од неговиот кабинет по средствата со министерот за надворешни работи на Хрватска, Гордан Грлиќ-Радман.
Радев, велат од неговиот кабинет, на средбата изразил поддршка за желбата на Бугарите во земјава да бидат вклучени во преамбулата на Уставот, како и дека очекува тие објективно да бидат прикажани во резултатите од пописот.
„За нас е важно меѓу младите од Република Северна Македонија да не се влева омраза кон Бугарите“,
рекол Радев алудирајќи на учебниците во земјата, каде, според него, има искривени толкувања на Бугарија и Бугарите.
Од кабинетот на бугарскиот претседател велат и дека тој задно со хрватскиот шеф на дипломатијата биле едногласни дека европската перспектива на регионот е од клучно значење во интерес на стабилноста на Балканот, но тоа мора да биде со исполнување на сите критериуми.
Вклучувањето на земјите од регионот во ЕУ и воспоставувањето на демократски вредности на Балканот, вели тој, е важно не само за обединета Европа, туку пред сè, е во интерес на сите граѓани во регионот.
На тема за спорот меѓу Северна Македонија и Бугарија денеска на средба со хрватскиот министер за надворешни работи, зборуваше и шефот на бугарската дипломатија, Светлан Стоев. На заедничка прес-конференција со Радман, Стоев посочи дека Бугарија инвестирала многу во дијалогот со Република Северна Македонија, како и тоа оти очекува конкретни дејствија од Скопје за трајно спроведување на Договорот за добрососедство од 2017, како и почитување на правата на граѓаните со бугарска самосвест.
Стоев информира дека преговорите на експертско ниво меѓу Скопје и Софија течат, и оти се предадени бугарските предлози и текстови. Исто така, тој истакна дека до крајот на октомври ќе има нов круг консултации меѓу Бугарија и Северна Македонија и доколку се постигне согласност, она што ќе биде договорено, може да биде потпишано од двајцата министри за надворешни работи.
Стоев рече и дека продолжува дијалогот за ова прашање и со еврокомесарот за проширување Оливер Вархеји.