Ако е направено нешто спротивно на закон, нормално дека треба да се сноси одговорност. Но, јас не сум обвинител или судија, поминаа времињата кога политичар беше и претседател и обвинител и судија. Оставам на правосудните и истражните органи да утврдат дали имало некакво постапување спротивно на законот, вели премиерот
Имаше ревизорски извештај за работата на МЕПСО, но Владата не може да се меша во работата на државниот електропреносен систем на ниво на дневно управување. Јас не сум обвинител или судија, но, ако е направено нешто спротивно на законот, нормално дека ќе треба да се сноси одговорност, рече премиерот Димитар Ковачевски во одговор на новинарско прашање.
Тој рече дека имало ревизорски извештај за работата на МЕПСО. Таму, како што додаде, веќе има и нов генерален директор и нови членови на Управен одбор.
„МЕПСО е независно во своето управување бидејќи има органи на управување. Согласно европските регулативи и согласно со правила на европската енергетска заедница, Владата не може да се меша во работата на државниот електропреносен систем на ниво на дневно управување. Затоа, во оваа држава постојат органи кои испитуваат дали некој правилно или неправилно работи, треба да се провери книговодствениот третман, дали се работи за отписи или за резервации на ненаплатени побарувања, и трето, на Управниот одбор на МЕПСО е да определи колкави гаранции ќе бара во делот на обезбедување на балансна енергија или кој било тип на енергија кој што тие го користат. Се работеше за тежок период кога тие долгови беа направени“,
додаде Ковачевски.
Како што рече, во тој период имало недостиг на електрична енергија како во државата така и на европскиот континент.
„Имаше енормно покачување на цените кои компаниите тешко го менаџираа, а на менаџментот на МЕПСО останува тие средства да ги наплати и да спроведува постапки кои ќе обезбедат заштита пред се на интересот на компанијата и на државата, бидејќи се државни претпријатија“,
рече Ковачевски.
Премиерот нагласи дека ако е направено нешто спротивно на закон тогаш ќе треба да се сноси одговорност.
„Ако е направено нешто спротивно на закон, нормално дека треба да се сноси одговорност. Но, јас не сум обвинител или судија, поминаа времињата кога политичар беше и претседател и обвинител и судија. Оставам на правосудните и истражните органи да утврдат дали имало некакво постапување спротивно на законот“,
додаде Ковачевски.
Државниот завод за ревизија (ДЗР) минатата недела објави извештај за финансиското работење и усогласеноста за 2021 година на АД МЕПСО, каде што меѓу клучните наоди е дека од вкупно 15 милиони евра долг на трговци со електрична енергија се врши „резервација“ на 14 милиони.
станува збор за трговци кои решиле да ја користат балансната енергија од системот на МЕПСО бидејќи беше далеку поевтина од цената на берзите, која инаку не е предвидена за снабдување на стопанството. МЕПСО, пак, позајмуваше од Европскиот енергетски систем. Штом европската заедница разбра што се случува, ја предупреди земјава дека ќе плаќа огромни пенали.