Во писмото, сопругата на украинскиот претседател порачува дека ова не е специјална воена операција како што тврди Кремељ, туку масовно убиство на цивили. Најстрашното, вели Зеленска, е што има деца жртви, а во моментов, нагласува, има десетици деца кои не знаат што е мир
„Со ова писмо сведочам и му порачувам на светот: војната во Украина не е војна ’таму некаде‘. Ова е војна во Европа, блиску до границите на ЕУ. Украина ја запира силата која утре може агресивно да влезе и во важите градови под изговор дека спасува цивили“, пишува првата дама
Првата дама на Украина, Олена Зеленска, се огласи во јавноста за првпат по руската инвазија на нејзината земја која започна на 24 февруари. Преку отворено писмо објавено на социјалните мрежи на повеќе јазици, таа се обраќа до глобалните медиуми велејќи дека ова е нејзиниот одговор на бројните барања за интервјуа и нејзино лично сведоштво од Украина.
„Тоа што се случи пред повеќе од една недела е нешто во што не беше можно да се верува. Нашата земја беше мирна, нашите градови и села беа полни со живот. На 24 февруари сите се разбудивме од најавата за руска инвазија. Тенкови ја минуваа украинската граница, авиони влегуваа во нашиот воздушен простор, ракетни фрлачи ги опколија нашите градови“,
пишува Зеленска на почетокот од нејзиното писмо.
И покрај уверувањата од Кремљ дека ова е „специјална војна“, таа порачува дека ова што се случува е всушност масовно убиство на украинските цивили.
„Можеби најстрашното од оваа инвазија се децата жртви. Осумгодишната Алис која загина на улиците во Охтирка додека нејзиниот дедо се обидувал да ја заштити. Или Полина од Киев која загина со нејзините родители при гранатирањето. 14-годишниот Арсениј беше погоден од урнатини по главата, а не можел да се спаси зашто Итната помош не можела да дојде до него поради интензивните пожари“,
вели сопругата на украинскиот претседател порачувајќи дека ова се имињата на децата-жртви кои ги извикува кога Русија тврди дека не води војна против цивилите.
Украинската прва дама во отвореното писмо потсетува и на сликите од метро станиците и скривниците во Киев и Харков каде се кријат жените и деца велејќи дека тоа е сега ужасната реалност за Украинците.
„Во некои градови семејствата не можат да излезат од засолништата неколку денови по ред бидејќи неселективно и намерно се бомбардира и гранатира цивилната инфраструктура“,
вели Зеленска.
Таа посетува и на раѓањето бебиња во скривници и порачува оти има десетици деца во Украина кои не знаат што е мир.
„На некои луѓе им е потребна интензивна нега и континуиран третман, кои сега не може да го добијат. Колку е лесно да се инјектира инсулин во подрум? Или да се земаат лекови за астма под силен оган? Да не ги споменувам илјадниците пациенти болни од рак за кои пристапот до хемотерапија и третман со зрачење, кои се суштински, сега им се одложени на неодредено време“,
вели Зеленска.
Таа понатаму се осврнува и на бегалската криза велејќи дека „патиштата сега се преплавени со бегалците“.
„Погледнете во очите на овие уморни жени и деца кои со себе ја носат болката и тагата од напуштањето на најблиските и животот што го оставаат зад себе. Мажите кои ги носеа до граница леат солзи, но храбро се враќаат да се борат за нашата слобода. И покрај целиот ужас, Украинците не се откажуваат“,
пишува првата дама на Украина.
Таа го споменува и Путин нарекувајќи го „агресорот“.
„Путин ја потцени нашата земја, нашиот народ и нашиот патриотизам. Украинците, без оглед на нивните политички ставови, мајчиниот јазик, верувањата и националностите, стојат заедно во единство. Додека пропагандистите на Кремљ се фалеа дека Украинците ќе ги пречекаат со цвеќиња како спасители, тие беа дочекувани со молотови коктели“,
вели сопругата на украинскиот претседател.
Зеленска им се заблагодарува и на граѓаните кои се координираат за да помогнат, како и на оние кои продолжуваат да работат во аптеките, продавниците, јавниот превоз … Исто така, упатува благодарност и до оние кои обезбедиле хуманитарна помош за украинските граѓани и на земјите кои ги отворија границите за бегалците, како и до сите кои се организираат и преку собири и протести ја поддржуваат Украина.
„Ве гледаме! Ние сме тука, гледаме и ја цениме вашата поддршка. Украина сака мир. Но, Украина ќе ги брани своите граници и својот идентитет“,
порачува Зеленска.
И таа порачува дека се потребни уште безбедносни коридори за да бидат евакуирани оние кои сè уште се наоѓаат во подрумите и скривниците, но исто како и нејзиниот сопруг, бара од западните власти да се затвори небото над Украина за летови.
До медиумите, пак, таа апелира и понатаму да продолжат да покажуваат што се случува во Украина.
„И со ова писмо сведочам и му порачувам на светот: војната во Украина не е војна ’таму некаде‘. Ова е војна во Европа, блиску до границите на ЕУ. Украина ја запира силата која утре може агресивно да влезе и во важите градови под изговор дека спасува цивили“,
пишува првата дама.
Писмото таа го завршува со пораката:
„Ако не го запреме Путин, кој се заканува дека ќе започне нуклеарна војна, нема да има безбедно место во светот за никој од нас. Ние ќе победиме. Ќе победиме поради нашето единство. Единство во љубовта кон Украина. Слава на Украина“.