Одлуката за привремено одложување на активностите во парламентот, како што додаваат оттаму, не е резултат на какво било индивидуално или еднострано политичко одлучување, туку одраз на заедничка институционална волја на сите пратенички групи да дејствуваат со чувствителност во момент на национална жалост
Откако вчера беше објавено дека Собранието ја одложува работата за уште една недела поради сензитивноста на случајот во Кочани, денеска од парламентот појаснуваат дека ваквата одлука е донесена со согласност на сите присутни пратенички групи кои биле присутни на координативната средба одржана вчера, 24 март.
Одлуката за привремено одложување на активностите во парламентот, како што додаваат оттаму, не е резултат на какво било индивидуално или еднострано политичко одлучување, туку одраз на заедничка институционална волја на сите пратенички групи да дејствуваат со чувствителност во момент на национална жалост.
„Привременото одложување на активностите на Собранието беше гест на почит кон трагедијата во Кочани, каде што животот го загубија млади луѓе и израз на солидарност со семејствата на жртвите и со сите граѓани погодени од оваа катастрофа. Собранието ќе продолжи со работа следната недела“,
информираат од парламентот.
На вчерашната координација, како што соопштија од Собранието, присуствувале спикерот Африм Гаши, потпретседателката Весна Бендевска и координаторите на ВМРО-ДПМНЕ, СДСМ, „Вреди“, Движењето ЗНАМ и Левица, како и претставник од Владата и генералната секретарка на Собранието.