За истрагата за злоупотреби во Платежната агенција за земјоделство, Коцевски посочи дека сè уште не е познато дали ќе има проширување на бројот на осомничени
Државниот јавен обвинител, Љупчо Коцевски, вечерва во интервју за ТВ Сител се осврна на два актуелни случаи, истакнувајќи дека Обвинителството во случајот со наводите за непотребни операции на срце сè уште ги чека официјалните документи, додека истрагата за злоупотребите во Платежната агенција мора да се води брзо поради притворените лица.
Во однос на случајот со наводите за извршени непотребни операции на срце на пациенти, обвинителот Коцевски изјави дека Обвинителството сè уште нема посебни информации освен оние што се објавуваат во медиумите.
„Чекаме одлука од Комисијата за тој случај и таа да ни достави документација за евентуално да постапиме и да дадеме одредени упатства за преземање дејствија“,
рече Коцевски.
За истрагата за злоупотреби во Платежната агенција за земјоделство, Коцевски посочи дека сè уште не е познато дали ќе има проширување на бројот на осомничени.
Во моментов, рече тој, се истражуваат телефоните на осомничените, од кои неколкумина се во притвор, а едно лице е во домашен притвор.
„Постапката мора да биде брза имајќи предвид дека се работи за притворенички предмет. Но, сè зависи од добивање на доказите, односно обезбедување цврсти и сигурни докази“,
додаде државниот јавен обвинител.
Инаку, министерот за здравство Азир Алиу, минатата недела, рече дека интерната комисија за кардиолошки и кардиохируршки интервенции при Министерството за здравство, од 19 анализирани пријави од пациенти и институции за сомнителни случаи на непотребно извршени интервенции на срце во јавни и приватни здравствени установи, кај 10 утврдила дека се непотребно извршени операции или непотребно се упатени за операции.
За дополнителни шест пријави комисијата утврдила дека треба да се испратат до Државниот санитарен и здравствен инспекторат (ДСЗИ) бидејќи таа не е надлежна.
Во интервју за „360 степени“, Алиу рече дека по конечниот извештај за случаите со непотребно упатување на операција и непотребно спроведени операции на срце, Министерството за здравство ќе се консултира со правници за следните чекори поврзани со евентуална одговорност и санкции.
Тој додаде дека имињата на болниците и лекарите кои непотребно упатувале на операции и непотребно направиле операции на пациенти со кардиоваскуларни дијагнози ќе бидат објавени кога извештајот ќе биде конечен. Тоа, посочи Алиу, би следувало по втората фаза, кога во комисијата ќе се вклучат меѓународните експерти.