Од 1 до 8 октомври до Собранието се доставени 151 нов предлог-закон, измени и дополнувања на закони и ратификации, голем дел по скратена постапка. За ова забелешка беше ставена и во последниот Извештај на ЕК за напредокот на земјата.
Во однос на законите по скратена постапка, многубројни се усогласувања со Законот за прекршоци, со кој беше предвидено намалување на казните, како и со мерките за справување со кризата со ковид-19, меѓу кои и економските пакет мерки што ги предлага Владата.
Претседателот на Собранието, Талат Џафери, на забелешките дека повторно пратениците ќе одлучуваат по голем број закони по скратена постапка, вели дека се работи на промени на Деловникот за да се најдат најсоодветни решенија за ограничување на бројот на закони по скратена постапка и оти некои закони се врзани со пандемијата на ковид-19.
„Треба да имате предвид дека Собранието не работеше до 4 август, кога беше конститутивната седница. Многу работи околу пандемијата и околу околностите и обврските што требаше да се регулираат по престанокот на вонредната состојба требаше да чекаат Собранието да ги реши. Водете сметка кога сме избрале Влада, и ако одевме во редовна постапка, тие закони ќе се донесеа дури во ноември“,
рече Џафери.
Околностите, нагласува тој, треба да се гледаат како целина, а не само како сегмент.
Меѓу законите што се најдоа во овие 151, кои се доставени до Собранието, се и предлог-законот за попис во 2020, кој првично беше доставен до законодавниот дом во минатиот состав, потоа предлог-законот за огласување ништовност и поништување на правни акти, дејствија, мерки и правни последици од постапките за лустрација, предлог-законот за контрола на опојни дроги и психотропни супстанции, како и други.