Од почетокот на сезоната заклучно со вчера напладне вкупниот број на заразени е 124, а регистрирани се вкупно 15 смртни случаи. Починатите лица биле на возраст меѓу 61 и 92 години
Нови 24 случаи на вирусот Западен Нил регистрирани последнава недела во Грција, додека, пак, починале две лица, покажува неделниот извештај на Националната организација за јавно здравје (ЕОДИ), јави МИА.
Од почетокот на сезоната заклучно со вчера напладне вкупниот број на заразени е 124, а регистрирани се вкупно 15 смртни случаи. Починатите лица биле на возраст меѓу 61 и 92 години.
Дополнително во изминатиот период постојат и три увезени случаи од Албанија, односно инфекција кај пациенти изложени во друга земја, кои не се опфатени во анализите на ЕОДИ.
Потврдени случаи на вирусот Западен Нил, што го пренесуваат комарците, има речиси во цела Грција, во северниот, североисточниот, западниот и централниот дел на земјата, во Епир и Јонските острови, на Пелопонез, како и во областа Атика, поширокиот регион на Атина.
Вирусот во земјата е присутен во летниот период од 2010 до 2014 година, како и од 2017 до денес.
Најголем број случаи на Западен Нил имало во 2018 година, вкупно 317, а истото лето, највисок бил и бројот на починати лица, вкупно 51.
Лани во Грција биле регистрирани 162 случаи, а од Западен Нил починале 23 лица.
Првиот случај годинава на заразен со вирусот Западен Нил во Грција беше регистриран на почетокот на јули.