„Овој протест е израз на длабока болка и револт за загубените животи, но и за состојбата во која се наоѓаме како општество“, се вели во објавата
За денеска во 13 часот најавен е протест во Градскиот парк во Кочани, а за кој се информира преку социјалните мрежи и доаѓа по несреќата во која загинаа 59 лица.
„Овој протест е израз на длабока болка и револт за загубените животи, но и за состојбата во која се наоѓаме како општество. Не можеме да ги вратиме нашите мили сограѓани, но сме должни да се бориме во нивна чест и за нив да го смениме овој неефикасен систем кој нè обезбедува сигурност, благосостојба и праведност“,
се наведува во објава на фејсбук-страницата Кочани.
Во објавата во која пишува „Оставка веднаш колективно!!!“ се вели дека граѓаните бараат конкретни промени.
„Ќе се бориме за град без партиски вработувања, за институции кои функционираат, за полиција која е тука за нас, за инспекциски служби кои ќе ги вршат своите обврски, за јавни простори кои ќе бидат безбедни и чисти. Протестот е за правдата, за секој од нас, за секоја жртва што ја изгубивме и за сите нас што го живееме овој град секој ден“,
се додава во повикот за протест.
Оттаму додаваат дека е потребно да се преиспита регуларноста на сите угостителски објекти, особено пицериите кои ги имаат проширено и легализирано своите тераси на нелегален начин.
„Кафулињата што ги проширија своите објекти низ цел трговски простор, и колите паркирани по тротоарите, кои ја блокираат пешачката патека, создаваат опасности за нас. Не смееме да заборавиме ниту дека не се почитува забраната за фрлање отпад од другите општини на депонијата, каде што со полициска придружба се дозволи да се фрла отпад на истата“,
се вели во објавата.
Во пожарот што се случи вчера животот го загубија 59 лица, а над 140 повредени се згрижени во земјава и странство.
Утринава од Јавното обвинителство информираа дека во тек се рочишта за определување притвори за лицата осомничени за случајот со пожарот во дискотеката во Кочани.
За случајот досега се сослушани над 20 лица, а за 11 Обвинителството поведе постапка за проверка. Од нив за осум лица веќе е поднесен предлог за краткотраен притвор, додека останатите три сè уште се хоспитализирани во потешка здравствена состојба.
Според досегашната истрага на институциите, во дискотеката немало хидрантска мрежа и доволно ПП апарати, во неа противзаконски биле користени пиротехнички материјали, немала ниту легална лиценца за работа и не бил склучен писмен договор меѓу организаторот и групата што настапувала.
Како што соопшти синоќа државниот јавен обвинител Љупчо Коцевски, досега се сослушани над 20 лица, меѓу кои и еден од организаторите на настанот, а потврди дека на информативен разговор бил повикан и поранешниот министер за економија Крешник Бектеши.
Министерот за внатрешни работи Панче Тошковски соопшти дека дел од осомничените за предизвикување на овој кривично правен настан се починати, дел се во болница. Четири лица досега се обезбедени во болница – два члена на бендот, син на сопственик на дискотека и управител на правното лице кое што ја менаџирало дискотеката.