Изјавата на поранешниот министер и ексшеф на српската Безбедносно-информативна агенција ја пренесе и бугарската новинска агенција БГНЕС. Во веста насловена како „Мачетата на Путин и Вучиќ ја напаѓа Македонија со примитивизам“, бугарската агенција пишува дека Александар Вулин, десна рака на српскиот претседател Александар Вучиќ, е најжестокиот бранител на големосрпскиот проект „Српски свет“ кој има за цел, како што се додава, да ги потчини соседните земји под власта на Белград
Северномакедонците знаат дека нивниот глас не значи ништо, дури ни кога станува збор за одлучување за нивното име или јазик, а уште помалку за Србите, па би можеле барем да се воздржат ако не можат да ја поддржат Србија.
Ова е дел од изјавата на Александар Вулин – поранешен шеф на српската Безбедносно-информативна агенција (БИА) и ексминистер за одбрана и внатрешни работи на Србија – како реакција на изјавата на шефот на македонската дипломатија Бујар Османи оти земјава е еден од коспонзорите на резолуција во Обединетите нации за прогласување на 11 јули за Меѓународен ден за сеќавање и комеморација на геноцидот во Сребреница.
Во реакцијата на Вулин, која ја пренесоа српски Новости, тој, меѓу другото, вели дека Србија била едиствената земја која граничи со С Македонија, која од нас никогаш не побарала смена на државното име, историјата, Уставот или официјалниот јазик. Додава дека за се досега направено за неа, С Македонија ѝ се заблагодарила на Србија со тоа што го признала „таканареченото Косово, а сега со ентузијазам учествува во резолуција со која Србите треба да ги прогласи за геноцидна нација“.
„Кога се викаа Поранешна Југословенска Република Македонија и Скопје, ние ги нарекувавме Македонија. Со нив делевме лекови за време на ковид-пандемијата, им ги дадовме нашите резерви од жито, брашно и шеќер, а Српската православна црква (СПЦ) на Македонската црква ѝ даде независност и име. Северномакедонците знаат дека нивниот глас не значи ништо, дури ни кога станува збор за нивното име или јазик, а уште помалку за Србите, па затоа можеле барем да се воздржат доколку неможат да ја поддржат Србија. Северна Македонија навистина треба да го смени јазикот заедно со името и историјата, како што бараат Бугарите. Навистина е глупаво да користат речник во кој немаат зборови за чест, благодарност, пријателство, слобода, срам“,
гласи реакцијата на Вулин која ја пренесе Новости.
Изјавата на поранешниот министер и ексшеф на српската Безбедносно-информативна агенција ја пренесе и бугарската новинска агенција БГНЕС. Во веста насловена како „Мачетата на Путин и Вучиќ ја напаѓа Македонија со примитивизам“, бугарската агенција пишува дека Александар Вулин, десна рака на српскиот претседател Александар Вучиќ, е најжестокиот бранител на големосрпскиот проект „Српски свет“ кој има за цел, како што се додава, да ги потчини соседните земји под власта на Белград.
„Тој се смета за ‘топ’ на руските интереси за дестабилизација на Балканот и за организирање на терористичкиот напад во селото Банска, северно Косово кога српска терористичка група ги нападна косовските безбедносни сили. Вулин е добитник на рускиот државен орден за пријателство ‘за обезбедување на државната безбедност и заштита на националните интереси на Русија и Србија’“,
пишува, меѓу другото, БГНЕС во веста во која ја пренесува изјавата на Вулин.
Реакцијата на поранешниот министер и прв човек на српската БИА, Александар Вулин, следува откако шефот на македонската дипломатија Бујар Османи денеска објави дека С Македонија е коспонзор заедно со Германија, САД и други држави на резолуција во Обединетите нации за прогласување на 11 јули за Меѓународен ден за сеќавање и комеморација на геноцидот во Сребреница 1995 година и одбележување секоја година.
Одговарајќи на новинарско прашање како очекува ова да влијае на односите со Србија, Османи рече дека односите со која било земја можат да бидат нарушени, како што рече, зашто осудуваме геноцид.