Српскиот претседател вели дека нема никаков интерес да го разгори огнот кај спротивната страна, но оценува дека се добива впечаток оти во Приштина се опседнати со него
Во Брисел знаат која страна го попречува напредокот во дијалогот меѓу Белград и Приштина, но тоа јавно никој нема да го каже, изјави српскиот претседател Александар Вучиќ за „Политико“ посочувајќи дека Европската Унија и САД се согласуваат со Србија за ова.
Во текстот се наведува дека Вучиќ неодамна повика на повторно одржување на избори во четири општини на северот на Косово со српско население, но дека премиерот на Косово, Албин Курти, ги охрабрил политичарите да ги окупираат тамошните административни згради што доведе до криза и подигање на страстите од двете страни.
На обвинувањата на Курти дека Вучиќ спроведува неразумни и очајни мерки и дека води агресивна кампања, Вучиќ му одговори: „Ако е неразумно и агресивно да се имаат демократски избори, тогаш добро, многу ви благодарам“.
Вучиќ за „Политко“ вели дека нема никаков интерес да го разгори огнот кај спротивната страна, но оценува дека се добива впечаток дека во Приштина се опседнати со него.
„Ако читате што зборуваат секој ден, ќе видите дека тоа е само Вучиќ, Вучиќ“,
вели тој.
Оваа недела требаше да се одржи трилатерален состанок на главните преговарачки тимови на Белград и Приштина со посредство на специјалниот пратеник на ЕУ за дијалог Мирослав Лајчак, но тоа не се случи.
Претседателката на Европската комисија Урсула фон дер Лајен ги покани балканските лидери на работен ручек во Брисел за да разговараат за агендата за раст на ЕУ и интеграцијата на регионот во европскиот единствен пазар.
Иако на состанокот присуствуваат Курти и Вучиќ, тие не разговараа.
„Воопшто немаме никакви односи“,
рече Вучиќ.
Критичарите, според текстот на „Политико“, го обвинуваат српскиот водач дека игра двојна игра поттикнувајќи ги локалните Срби во Косово на отпор, а дека потоа кога Приштина реагира глуми жртва.
Како што пишува „Политико“, Белград инсистира на тоа дека Приштина треба да ги почитува постоечките договори, вклучително и обврските од Бриселскиот договор, кои се однесуваат на формирање на Заедницата на српските општини (ЗСО).