Името на мандатарот ќе го соопштам во рок од 48 часа, како претседател на Републиката, изјави лидерот на Српската напредна странка (СНС) и претседател на Србија, Александар Вучиќ. Името го знае, но рече дека не може да го објави како претседател на партијата, туку како претседател на државата, јави дописникот на МИА од Белград.
„Или во петок навечер или во сабота наутро – ќе го дознаете името на мандатарот. Имаше дискусии дека некои други треба да бидат, не само од СНС, но огромен број луѓе сакаа да биде еден од нашите двајца кандидати – Брнабиќ или Вучевиќ,“
рече Вучиќ на прес-конференцијата по седницата на Претседателството на СНС на која се разговарало за прашањето за мандатарот и составот на идната влада и ситуацијата на Косово.
Вучиќ истакна дека Брнабиќ и Вучевиќ уживаат голема доверба во партијата, истакнувајќи дека е одлучено тој како претседател на Србија да го одлучи името на мандатарот.
„Бидејќи и двајцата кандидати уживаат голема доверба на партиското членство – и Ана Брнабиќ и Милош Вучевиќ, тогаш луѓето не сакаа да се изјаснат со гласање, туку рекоа дека ќе ја прифатат онаа одлука што ќе ја изнесам во согласност со уставните овластувања, како претседател на Републиката, а можев да го слушнам мислењето на повеќе од 20 членови на Претседателството на СНС кои го кажаа своето мислење за ова прашање“,
рече Вучиќ.
Тој додаде дека и Брнабиќ и Вучевиќ ќе бидат дел од Владата, а на која функција рече дека ќе се знае за два дена.