Ние не сме пуст остров, живееме заедно со другите, изјавил српскиот претседател коментирајќи за вакцинирањето граѓани од соседството
Претседателот на Србија, Александар Вучиќ, денеска изјави дека е во секојдневен контакт со Северна Македонија и Црна Гора и дека Србија бара начини како дополнително да им помогне на двете земји во вакцинирањето на населението.
Како што јави на МИА од Белград, Вучиќ рекол дека не разбира кога некој го критикува тоа што во Србија дошле стопанственици од регионот и што странските државјани доаѓаат поради вакцинирање, како и дека не му е важно и нема проблем со „недостиг на благодарност од колегите“.
„За мене е важно луѓето да бидат задоволни, да бидат делумно заштитени сега кога ја примија првата доза, а кога ќе ја добијат втората, тие ќе бидат уште подобри и ќе се заштитени од тешки последици и смрт или барем во 99 отсто од случаите. Тоа е она што можеме да сториме за луѓето“,
изјави Вучиќ одговарајќи колку е горд на пишувањето на медиумите во регионот што вакцинирањето на луѓе од земјите од Западен Балкан е организирано во Србија.
На Вучиќ не му е јасно, како што истакна, како некој не разбира дека српските граѓани не можат да бидат спасени ако и луѓето во регионот не се.
„Не знам како некој тоа не го разбира, ние не сме пуст остров, живееме заедно со другите“,
рече Вучиќ.