За рускиот претседател Владимир Путин, победата на Ердоган на овие избори била природна последица на неговата, како што вели, несебична работа како претседател на Турција. Претседателот на Србијa, Александар Вучиќ, пак, во честитката му посака успех на Реџеп Таип Ердоган, со желба во овој мандат да остане посветен на натамошниот развој на неговата земја и благосостојбата на граѓаните
Додека турската нација сè уште ги чека официјалните изборни резултати од вториот круг на претседателските избори, а актуелниот претседател Реџеп Таип Ердоган на големо го слави својот нов мандат, на негова адреса веќе почнаа да пристигнуваат честитки од челници на некои држави.
Меѓу првите кои му ја честитаа победата беа унгарскиот премиер Виктор Орбан, српскиот претседател Александар Вучиќ, но и претседателот на Руската Федерација, Владимир Путин.
Орбан во објава на Твитер му ја честита на Ердоган неговата, како што вели, несомнена победа на изборите.
„Честитки до претседателот Реџеп Таип Ердоган на неговата несомнена изборна победа!“,
напиша Орбан во честитката.
Congratulations to President @RTErdogan on his unquestionable election victory! Tebrikler, Sayın Cumhurbaşkanı! pic.twitter.com/I1IR7g3EWe
— Orbán Viktor (@PM_ViktorOrban) May 28, 2023
Честитки до шефот на Турција испратија и претседателот на ентитетот Република Српска, Милорад Додик, и српскиот претседател Александар Вучиќ.
Додик ја нарече победата на Ердоган историска и порача дека неговиот избор за претседател не е од важност само за Турција, туку и за остатокот од светот.
Претседателот на Србија, Александар Вучиќ, пак, во честитката му посака успех на Реџеп Таип Ердоган, со желба во овој мандат да остане посветен на натамошниот развој на неговата земја и благосостојбата на граѓаните.
„Се надевам дека заедно ќе работиме на нови иницијативи кои ќе го забрзаат силниот развој на целиот регион, но и ќе ги зближат луѓето и ќе ги поврзат економиите за доброто на сите наши граѓани. Како доверлив и сериозен партнер на Турција во Западен Балкан, Србија останува решена посветено да работи на натамошно проширување и зајакнување на нашите односи, засновани на меѓусебно разбирање и благодарност, како и искрени пријателски врски со турскиот народ“,
се вели во честитката на претседателот на Република Србија, Александар Вучиќ.
За претседателот на Русија, Владимир Путин, победата на Ердоган на овие избори била природна последица на неговата, како што вели, несебична работа како претседател на Турција.
„Победата на изборите беше природна последица на вашата несебична работа како шеф на Република Турција и е јасен доказ за поддршката на турскиот народ за вашите напори за зајакнување на државниот суверенитет и за независна надворешна политика“,
се вели во честитката на Путин, која ја објави Кремљ.
Рускиот претседател во честитката додава дека викоко го цени личниот придонес на Ердоган во зајакнување на руско-турските односи и заемната соработка во различни области.
Честитка за изборната победа Ердоган доби и од албанскиот премиер Еди Рама.
„Честитки за победата господине претседателе“,
напиша кусо Рама на Фејсбук.