Таа, како што изјави за српски „Н1“, се чувствува добро, иако е уморна бидејќи, како што вели, не влегла во штрајкот со глад подготвена
Дијана Хрка, мајката на Стефан Хрка, кој почина при падот на натстрешницата на железничката станица во Нови Сад, штрајкува со глад седми ден. Таа денес се причести во црквата „Свети Марко“, со порака дека сега „сè е во Божји раце“.
Таа, како што изјави за српски „Н1“, се чувствува добро, иако е уморна бидејќи, како што вели, не влегла во штрајкот со глад подготвена.
Хрка, исто така, наведува дека пред штрајкот пешачела со студенти до Нови Сад, отишла на одбележувањето на годишнината од падот на натстрешницата, а само еден ден подоцна престанала да јаде, па сето ова придонело за нејзиниот замор.
Дијана Хрка има поддршка од граѓани, средношколци и студенти. Некои студенти поставија шатори до нејзините и таму ја поминуваат ноќта. Хрка сè уште спие надвор, на дрвени палети, во близина на Собранието, односно оградата што ја обезбедува шаторската населба попозната како „Чациленд“, која ја обезбедува полицијата.
Српскиот претседател Александар Вучиќ ѝ порача на Дијана Хрка дека е подготвен да разговара со неа и дека неговата совест е чиста.
Вучиќ во изјава за РТС рече дека е подготвен да ја прими Дијана Хрка „секогаш и во секое време“ и оти е подготвен да ја посети, но дека разговорот треба да се одвива без „политичка претстава“ и без обиди за предизвикување инциденти.
„Јас сум претседател на сите граѓани и морам да ги трпам најлошите можни навреди и најлошите лаги, но секогаш морам да бидам подготвен да разговарам“,
рече Вучиќ додавајќи дека ја разбира сериозноста на нејзината болка.
Вучиќ ја замоли Дијана Хрка да го прекине штрајкот со глад, предупредувајќи дека „никој не треба да си игра со своето здравје“.
„Немам ништо лично против Дијана Хрка. Подготвен сум да разговарам, да слушам, да помогнам ако можам. Ако сака да дојде на претседателството, ќе ја прифатам без оглед на распоредот. Мојата совест е чиста, бидејќи ја водев земјата во тешки времиња и ја одржував стабилноста повеќе од 14 години“,
рече Вучиќ.
Тој потврди дека го посетил семејството Фириќ во Нови Сад, мајка која ги загуби своите ќерки Сара и Валентина при падот на бетонската натстрешница на железничката станица во Нови Сад лани.