Вучиќ најави дека поради односот кон косовските Срби, на Видовдан, на мирен начин, ќе преземат свои чекори за слобода, во рамките на меѓународните норми, внимавајќи на односите на Србија со НАТО
Дадовме сè од себе за да го зачуваме мирот, но колку и да се трудевме да бидеме сериозен и одговорен партнер на западните сили, тие никогаш не не гледаа така, рече претседателот Александар Вучиќ во своето денешно вонредно обраќање до јавноста.
Што се однесува до нашето политичко однесување, мислам дека секој разговор со човек кој никогаш не сакал да разговара е целосно бесмислен, рече Вучиќ.
„Не ми паѓа на памет да зборувам за не знам што додека не се ослободат уапсените Срби“,
рече Вучиќ.
Покрај ослободувањето на уапсените Срби, Вучиќ рече дека треба да се укине бесмислената одредба да не се пуштаат камионите со стока.
„Во одреден момент тие камиони ќе поминат. Сега, за еден месец или два, тие камиони ќе поминат. Исто така, се разбира, морам да кажам дека ова е кршење на сите можни договори. Но, што им е грижа, никој не се потресе“,
изјави Вучиќ.
Според него, бесмислено е да се разговара за што било додека лажните градоначалници не поднесат оставка и не се повлечат од северот или додека специјалните косовски полициски сили не се повлечат од тие општини.
„Кога тоа ќе се реши, тогаш разговорот ќе има смисла“,
рече Вучиќ.
Тој изјави и дека ќе одлучи дали ќе учествува во дијалогот и за тоа ќе ја информира јавноста 24 часа однапред.
Пред тоа, Вучиќ ги наброја сите инциденти, пукања, апсења на косовските Срби во изминатата година, обвинувајќи го Еулекс дека „не презема, ама баш ништо, дури ни во извештаите, дека само ја следи ситуацијата“.
Тој го спомна воениот конфликт во 2001 во Македонија, настаните во Теарце, Арачиново, ОНА, дека се убиени 75 припадници на македонските вооружени сили правејќи паралела со амнестијата која тогаш била побарана од Западот.
Според Вучиќ, кон Србија се води хибридна војна преку Србите на Косово и нивните лидери кои се обвинуваат за криминални дејствија, и дека според Западот Србија мора да биде виновна.
„Овде доаѓаме до суштинската одлука на западните земји, за која мораме да бидеме свесни. Тие дозволуваат пукање врз Србите, малтретирања на Србите. А, на Курти сè му е дозволено, тој провоцира, сака конфликт, сака војна по секоја цена, а во тоа има заштита, лаже дека нема заштита“,
посочи тој.
Вучиќ најави дека поради односот кон косовските Срби, на Видовдан, на мирен начин, тие ќе преземат свои чекори за слобода, во рамките на меѓународните норми, внимавајќи на односите на Србија само со НАТО.
Тој порача: „веќе никого нема да информираме, освен за подигање или спуштање на борбената готовност“.
„Освен нашите обврски кон НАТО, кои секогаш целосно ќе ги исполнуваме во согласност со Резолуцијата 1244. Ќе се обидеме да го зачуваме мирот, но ги предупредуваме сите оние што очигледно не се грижат за мирот и сакаат Србите да бидат малку потивки, а не толку гласно иселени од северот на Косово, што нема да се случи. Тоа е сè што треба да им кажам. Нека мислат или тврдат дека тоа е блеф, реалност, сеедно ми е, вака или онака“,
рече Вучиќ.