Националната влада на Камбоџа досега не излезе со официјални информации за евентуални жртви или евакуации на цивили, но локален функционер на покраината Одар Минчи за Ројтерс изјавил дека еден цивил е убиен, петмина се ранети и дека 1 500 семејства се евакуирани
Властите во Тајланд евакуирале повеќе од 130 000 луѓе вдолж границата со Камбоџа поради судирот меѓу двете земји, кој продолжува и денеска и, според властите во Банкок, се заканува да прерасне во отворена војна, пишува „Гардијан“.
Прекуграничните судири кои почнаа вчераутро, а продолжуваат и денеска, се едни од најкрвавите меѓу Тајланд и Камбоџа по повеќе од една деценија.
Според тајландската војска, борби се водат на 12 локации по должината на спорната граница, што се оценува како проширување на конфликтот.
„Овој актуелен случај на агресија ескалира и би можел да се развие до степен на војна. Сепак, во моментов сè уште сме на ниво на спор борејќи се со тешко оружје. Она што досега го презедовме е да ги заштитиме нашата земја и суверенитетот на нашата нација“,
изјави вршителот на должноста премиер на Тајланд, Фумтам Вечајачаи.
Тајландските власти соопштија дека 138 000 луѓе од четири погранични провинции се евакуирани, додека бројот на жртви во земјата се искачи на 15 лица, од кои само еден не е цивил. Меѓу убиените, како што пренесуваат агенциите, е и едно осумгодишно момче.
Националната влада на Камбоџа досега не излезе со официјални информации за евентуални жртви или евакуации на цивили, но локален функционер на покраината Одар Минчи за Ројтерс изјавил дека еден цивил е убиен, петмина се ранети и дека 1 500 семејства се евакуирани.
Тајландската војска објави дека рано утринава имало судири во две покраини – Убон Рачатани и Сурин.
„Силите на Камбоџа спроведоа континуирано бомбардирање користејќи тешко оружје, артилерија и ракетни системи БМ-21“,
се вели во соопштението на тајландската војска што го пренесуваат светските агенции.
На ова тајландските сили, како што се наведува, одговориле соодветно возвраќајќи со оган во согласност со тактичката ситуација.
Судирите избувнаа во четврток наутро по неколку недели тлеење на тензиите во врска со долготрајниот граничен спор меѓу двете соседни земји на Далечниот Исток. И Тајланд и Камбоџа се обвинуваат меѓусебно за тоа од каде дошле првите истрели.
Станува збор за конфликт кој своите корени ги има уште пред повеќе од 100 години, а се однесуваат на несогласувања околу граничната линија долга 817 километри поради претензиите што и двете земји отворено ги манифестираат.
Неодамнешните гранични тензии првично избувнаа во мај, кога војниците на двете земји разменија оган во спорна област, при што загина еден војник на Камбоџа. Ова доведе до одмазднички мерки од двете страни.
Кризата дополнително ескалира во средата, кога пет тајландски војници беа повредени од нагазна мина, втор ваков инцидент за една недела. Тајланд одговори со отповикување на својот амбасадор во Камбоџа во средата и најава за протерување на амбасадорот на Камбоџа во Бангкок. Тајланд тврди дека нагазните мини биле поставени во областа неодамна, наводи што Камбоџа остро ги негира.
Судирите ескалираа во четврток, при што Тајланд ја обвини Камбоџа за ракетни и артилериски напади, вклучително и во области каде што живеат цивили поради што воздухопловните сили на земјата започнале воздушни напади врз воени цели во Камбоџа.
Инаку, како што пишува „Гардијан“, спорот е разгорен и од националистички чувства и дополнително влошен од расправијата меѓу двајца моќни политичари во двете земји – Хун Сен, кој владееше со Камбоџа со железна тупаница четири децении пред да му ја предаде власта на својот син Хун Манет во 2023 година, и Таксин Шинаватра, поранешниот популистички лидер на Тајланд, чија ќерка Паетонгтарн стана премиерка во 2024 година. Двајцата поранешни лидери остануваат многу влијателни во своите земји.
Во четвртокот вечерта Таксин на социјалните мрежи изјави дека им се заблагодарил на земјите што понудиле да посредуваат во кризата, но дека би сакал да почека малку.
„Треба да ја оставиме тајландската војска да си ја заврши работата и да му одржиме лекција на Хун Сен“,
напиша тој.
Хун Сен одговори на Фејсбук дека воинствениот тон на Таксин ја нагласува воената агресија на Тајланд кон Камбоџа.
Советот за безбедност на Обединетите нации денеска треба да се состане во врска со најновиот конфликт.
Во меѓувреме, Соединетите Американски Држави (САД), кои се долгогодишен сојузник на Тајланд, повикаа на итен прекин на непријателствата.
„Ние сме сериозно загрижени од ескалацијата на насилството по должината на границата меѓу Тајланд и Камбоџа и длабоко жалиме за извештаите за штетите врз цивили. Соединетите Американски Држави бараат итен прекин на непријателствата, заштита на цивилите и мирно решавање на конфликтот“,
изјави заменик-портпаролот на Стејт департментот, Томи Пигот, на редовниот брифинг за медиумите.
Кина, исто така, изјави дека е длабоко загрижена од судирите и дека Пекинг на свој начин се труди и ќе продолжи да прави сѐ што може за да промовира мир и дијалог.
Тајландскиот премиер во изјава за новинарите рече дека ја осудува употребата на тешко оружје без јасна цел, надвор од конфликтните зони и додаде дека употребата на сила не е во согласност со меѓународното право.
„Остануваме посветени на мирни средства и треба да има дискусии, но она што се случи беше провокација и моравме да се одбраниме“,
додаде тој.