Теренот е непристапен, но и ризичен за гаснење на пожарот од земја со човечка сила бидејќи има заостанати неексплодирани смртоносни средства од Првата светска војна и постои реална опасност од нивно активирање, велат од Центарот за управување со кризи
Пожарот на Галичица може да ја загрози високата шума од страна на Преспанското и Охридското Езеро доколку огнените јазици се спуштат кон пониските делови на планината, велат од Центарот за управување со кризи (ЦУК).
„Во моментов се враќаме од хеликоптерско извидување на пожарот кој во текот на денешниот ден се појави на сртот на планината Галичица, а кој сè уште гори во граничниот појас на територијата на Албанија со голема веројатност во текот на ноќта да навлезе и на наша територија“,
соопшти попладнево ЦУК.
Карактеристично за овој пожар, според ЦУК, е силната експлозија што се слушнала попладнево, а за која се претпоставува дека е предизвикана од експлозивна направа, мина или друг вид експлозивно средство, остаток од борбите што се воделе на ова подрачје во балканските или Првата светска војна.
„Во моментов гори сува трева, грмушки и ниска деградирана ретка шума. Теренот е непристапен, но и ризичен за гаснење од земја со човечка сила бидејќи има заостанати неексплодирани смртоносни средства од Првата светска војна и постои реална опасност од нивно активирање. Опасност од проширување на пожарот постои и може да биде зафатена и заштитената зона од шума на Националниот парк ‘Галичица’“,
велат од ЦУК.
Од Главниот штаб за управување со кризи велат дека дополнително ќе одлучат на кој начин ќе се гасне овој пожар, ставајќи ја на прво место безбедноста на екипажот на хеликоптерите и безбедноста на луѓето кои ќе учествуваат во гаснењето на пожарот од земја.
Врвот Магаро и неговата околина во моментов не се безбедни за искачување, велат од ЦУК.
Пожарот започна на планината Галичица, на албанската територија. Екипите на Националниот парк „Галичица“ и граничната полиција се на терен. Според информациите на РЦУК Охрид, пожарот со помош на ветерот преминал на македонска територија кај граничен камен F-9.„