Жалбата која до Врховниот суд е поднесена од страна на одбраната на Ѓорчевски следува откако скопска апелација неодамна го одби како неосновано барањето за укинување на притворот на таткото на девојчето и го потврди решението од Кривичниот суд со кое му се продолжува мерката притвор за уште 30 дена
На јавна седница во Врховниот суд утре ќе се одлучува по жалбата против продолжување на мерката притвор за Александар Ѓорчевски, таткото на 14-годишната Вања, кој е еден од осомничените во овој случај.
„Советот за казниви дела при Врховниот суд на РСМ, постапувајќи по предлогот на осомничениот, истакнат во жалбата изјавена преку бранителот Владимир Туфегџиќ, адвокат од Скопје, закажа јавна седница за ден 13.03.2024 година, со почеток во 12:00 часот во судницата на првиот кат во Врховниот суд на РСМ“,
посочуваат денеска од Врховниот суд.
Жалбата која до Врховниот суд е поднесена од страна на одбраната на Ѓорчевски следува откако скопска Апелација неодамна го одби како неосновано барањето за укинување на притворот на таткото на девојчето и го потврди решението од Кривичниот суд со кое му се продолжува мерката притвор за уште 30 дена.
Адвокатот Владимир Туфегџиќ, кој е правен застапник на Ѓорчевски, бараше укинување на неговиот притвор поради тоа што, како што вели, досега не е предочен ниту еден доказ од кој произлегува основано сомневање за сторено кривично дело, ниту, пак, им е овозможен увид во предметот.
Во јануари годинава Кривичниот суд го одби барањето на Ѓорчевски да му биде одреден куќен притвор.
Обвинителството го сомничи таткото на Вања за кривично дело помагање во киднапирање и бара тој да остане во притвор поради опасност од бегство и влијание врз сведоци.