Високите утрински и дневни температури ќе се задржат до следната среда, поради што ќе биде активно портокалово ниво на опасност од високи температури
Сончево и многу топло со температури над 40 степени. Вакво време, според Управата за хидрометеоролошки работи (УХМР) нè очекува денеска во земјава.
На места ќе има мала локална облачност и умерен, повремено засилен ветер од западен и северозападен правец. Максималните температури ќе се движат во интервал од 30 до 41 Целзиусов степен, а УВ-индексот ќе изнесува 10.
Во Скопје претежно сончево и многу топло со слаб ветер од променлив правец. Температурата во главниот град денеска ќе достигне 38 степени.
Според УХМР, сончевото и многу топло време со високи утрински и дневни температури ќе се задржи до следната среда поради што ќе биде активно портокалово ниво на опасност од високи температури.
Во следните денови УВ-индексот во поголем дел од земјава ќе има вредност 10.