По сѐ изгледа враќањето на луѓето на Месечината ќе биде одложено за неколку години, а НАСА тврди дека тоа е најмногу поради значителни одложувања во развојот на вселенските костими
Испраќањето на американски астронаути на Месечината до 2024 година е неизводливо поради значителни одложувања во развојот на вселенските костими, соопшти генералниот инспектор на НАСА, Пол К. Мартин, во новиот извештај.
Иако НАСА потроши повеќе од една милијарда американски долари за вселенските костими од „следната генерација“, Мартин заклучи дека костимите нема да бидат подготвени најрано до април 2025 година и дека се неколку години далеку од готови. Целта за слетување на првата жена и следниот маж на Месечината првично беше поставена од администрацијата на Трамп за 2028 година, а администрацијата на Бајден потоа ја закажа за ноември 2024 година.
Извештајот го припишува одложувањето на недостатокот на средства, влијанијата на ковид-19 и технички предизвици. Во мигов има 27 различни компании кои обезбедуваат различни компоненти за костими, па Илон Маск од „Спејс икс“ на Твитер рече дека овој потфат изгледа „како да има премногу готвачи во кујната“ и додаде дека неговата компанија може да го стори тоа доколку е потребно.
Актуелниот администратор на НАСА, Бил Нелсон зборуваше за (не)подготвеноста за 2024 година во неодамнешно интервју за Си-ен-ен.
„Јас сум трезвено реален. Целта е 2024 година, иако ќе биде тешко. Има фактор број 1, а тоа е безбедноста, и ги вклучува луѓето. Може да има одложувања, но целта е крајот на 2024 година“,
рече тој.
„Спејс икс“ доби договор од НАСА во вредност од 2,9 милијарди долари во април – за развој на програмата „Артемида“, за слетување на Месечината. Меѓутоа, реализацијата на овој договор е одложена поради жалбите на два конкурента – „Блу ориџин“ и „Дајнетикс“. Генералниот инспектор рече дека и тоа влијае на одложувањето.
Инаку, од НАСА ја развиваат таа технологија веќе 14 години.
„Во овој миг, астронаутите користат ЕМУ-костими дизајнирани пред 45 години за Програмата за вселенски бродови и се потпираат на овие обновени и делумно редизајнирани вселенски костуми за вонредни активности на МВС“,
се вели во извештајот.