Од септември до декември 2021 година, додека бил вработен во правно лице во Скопје на работно место продавач, искористувајќи поволна пригода, со својот мобилен телефон ги фотографирал идентификациските податоци од платежните картички заедно со ПИН-кодот од картичките на купувачите, кои му ги давале за плаќање на купената стока
Единицата за економски и компјутерски криминал поднесе кривична пријава против 23 и 25-годишен, обајцата жители на с. Рашче, Скопско, поради сомнение за сторени кривични дела оштетување и неовластено навлегување во компјутерски систем по член 251 и изработка и употреба на лажна платежна картичка по член 274 Б од Кривичниот законик.
Првопријавениот, во периодот од септември до декември 2021, додека бил вработен во правно лице во Скопје на работно место продавач, искористувајќи поволна пригода, со својот мобилен телефон ги фотографирал идентификациските податоци од платежните картички заедно со ПИН-кодот од картичките на купувачите, кои му ги давале за плаќање на купената стока.
На тој начин успеал да собере податоци на 17 граѓани и потоа, заедно со второпријавениот, ги искористил во неколку наврати за плаќање комунални сметки и нарачки на производи.
По преземените мерки, било утврдено дека пријавените се сторители на делата.
Со судска наредба биле извршени претреси во нивните домови во с. Рашче и биле пронајдени докази за извршување на кривичните дела.