Изнесувајќи детали за несреќата во која загина 22-годишна девојка, од Обвинителството информираат дека 20-годишникот управувал со автомобил „пежо 207“, сопственост на неговиот татко. Возел без возачка дозвола, бил под дејство на алкохол и на обележаното место за пешачки премин поминал иако на семафорот светело црвено светло
Основното јавно обвинителство (ОЈО) Скопје поведе истрага и предложи мерка притвор за 20-годишникот кој вчеравечер со автомобил усмрти 22-годишна девојка на булеварот „Партизански одреди“ во Скопје.
Изнесувајќи детали за несреќата, од Обвинителството информираат дека момчето управувало со автомобил „пежо 207“, сопственост на неговиот татко. Возел без возачка дозвола, бил под дејство на алкохол и на обележаното место за пешачки премин поминал иако на семафорот светело црвено.
„Осомничениот 20-годишник на 29 јануари управувал патничко возило ‘пежо 207’ по десната сообраќајна лента од булевар ‘Партизански одреди’. Автомобилот го управувал без возачка дозвола и под дејство на алкохол со 0,82 промили присуство на алкохол во урина, со што го довел во опасност животот на луѓето. Кога дошол пред обележан пешачки премин на крстосницата со улица ’29 Ноември’ не ја приспособил брзината на движење на возилото спрема својствата и состојбата на патот и сообраќајот и другите сообраќајни услови за да може навремено да го запре возилото пред секоја пречка. Пред пешачкиот премин регулиран со семафори, кои за време на незгодата работеле исправно, продолжил со движење на вклучено црвено светло на семафорот и со предниот лев дел од возилото удрил во телото на пешакот – жртва Фросина Кулакова“,
се наведува во соопштението на ОЈО Скопје.
Девојката поминувала на обележаниот пешачки премин.
Од ударот се здобила со тешки телесни повреди од кои починала на самото место на несреќата.
- Дваесет и двегодишна девојка загина во сообраќајка на „Партизанска“, возачот што ја удрил е приведен
Несреќата се случи доцна синоќа, петнаесетина минути пред полноќ.