Поради поплави предизвикани од обилните врнежи на дожд во градовите и на снег на планините, во неколку града на југот од Србија локалните власти прогласија вонредна состојба. Ситуацијата од утрово се смирува, но над 10 000 домаќинства сè уште се без струја, јавува РТС.
Вонредната состојба е прогласена во Ниш, Врање, Лесковац, Власотинце, Дољевац, Бојник и други, каде што обилните дождови предизвикале поплави и ги заматила изворите на вода.
Градоначалничката на Ниш, Драгана Сотировски, во изјава за РТС нагласува дека водата е исправна за пиење, а во моментов само две населби немаат водат. Во друга населба, пак, поплавени се дворови каде што градските власти користат пумпи за испумпување на водата. Вонредната состојба, според градоначалничката, е прогласена за да може градот полесно да функционира.
Во Врање, пак, поплавени се околу 20 подрумски простории и дворови.
Според последните информации од Секторот за вонредни состојби, од утрово состојбата со поплавите на југот од Србија се стабилизира, а реките се повлекуваат откако престанаа обилните врнежи.