На прашањето како зголемувањето на цените на горивата ќе влијае на инфлацијата, односно на трошоците за живот и како ќе се интервенира во таков случај, Мицкоски рече дека очекува да има влијание, кое, според него, не би било големо
Премиерот Христијан Мицкоски денеска изјави дека Македонија има доволни количини гориво за потребите на граѓаните и бизнисот и не се размислува за ограничување на продажбата, иако граѓани од соседните земји точат гориво на нашите бензински пумпи.
Одговарајќи на новинарски прашања по тркалезната маса во Уставниот суд, премиерот наведе и дека се подмирени и потребите за струја, но, како што кажа, можно е повлекување на мазут од државните резерви за производство на електрична енергија.
Според премиерот, конзумот на гориво во земјава е зголемен вкупно за околу 10 отсто, но состојбата, како што кажа е стабилна. Посочи дека нафтоводот е во целосна функција, што претставува дополнителна сигурност, складиштата се полни согласно законските прописи, а државните резерви се за околу шеесетина дена.
„Имаме апсолутно доволно количини гориво за потребите на граѓаните и бизнисот. Зголемен е конзумот во одредени погранични области – со Албанија, Косово, Србија и Грција, вкупниот конзум е зголемен за околу 10 отсто. Граѓани од соседите тука точат гориво, зашто кај нас цената е во некои случаи и до половина евроценти за литар поевтина. Сакам да кажам дека и нафтоводот е во целосна функција, односно цевката е полна, што претставува дополнителна сигурност, складовите се полни согласно закон, државните резерви се околу шеесетина дена“,
рече Мицкоски.
Освен со бензините и дизелот, премиерот кажа и дека, според информациите што ги има, и дел од аеродромите во соседството се снабдуваат со керозин од земјава.
„И не само со дизел горивата и со бензините безоловни со 95 и 98 октани, информиран сум дека и дел од околните аеродроми се снабдуваат со керозин од ОКТА, односно од кај нас. Така што од земја која, ќе повторам, коленичеше и молеше, стануваме земја што генерира стабилност во регионот, се разбира предизвици има и ќе има. И тие предизвици ние ќе ги решаваме. Но, она коешто е најважно и ни е приоритет, а тоа е дека како држава имаме најниска цена за горивата за нашите граѓани и најниска цена за горивата за бизнисот“,
кажа премиерот.
Прашан за евентуално ослободување на резервите на мазут за производство на струја, Мицкоски кажа оти во моментот се размислува за таа опција. Во таа насока, премиерот кажа дека според информациите што ги добиле, оние количини мазут од околу 3 000 тони што требало да бидат повлечени на крајот на минатата година, кога беше прогласена кризна состојба, не се целосно повлечени.
„Така што, можеби ќе ја оживееме таа одлука, да се повлечат тие количини, па потоа евентуално би оделе со нова одлука. Денеска сум информиран од директорот на АД ЕСМ дека не само што ги задоволуваат потребите на граѓаните и конзумот, туку и продаваат навечер, со што имаме дополнителни приходи од страна на потрошувачите“,
наведе тој.
На прашањето како зголемувањето на цените на горивата ќе влијае на инфлацијата, односно на трошоците за живот и како ќе се интервенира во таков случај, Мицкоски рече дека очекува да има влијание, кое, според него, не би било големо.
Во таа насока, додаде дека треба да се почека да се види како ќе се пресметаат трошоците за живот.
Говорејќи во тој контекст, премиерот рече дека токму затоа како влада се одлучиле да интервенираат директно од буџетот, со намалување на Данокот на додадена вредност (ДДВ) од 18 на 10 отсто, а не со намалување на акцизите на горивата.
„Видете, има држави коишто прават привид, ги качуваат акцизите, а тоа е товар директно за горивото за 100, 200 отсто, и сега ги намалуваат за 50 отсто. Не, ние директно данокот го намалуваме, тоа што го собира државата. Ние покажуваме дека оваа Влада се грижи за граѓаните директно од буџетот, а не со трикови, ќе ги качиме акцизите дупло, па потоа ќе ги намалиме за 20, 30 проценти. Тоа е разликата меѓу одговорна влада којашто се грижи за граѓаните и влади коишто прават привид“,
рече Мицкоски.
Тој додаде оти секако, имаат план и за следни чекори, доколку кризата ескалира.
Според премиерот, ако сегашниот тренд на движење на цените на горивата на светските берзи остане, во понеделник може да се очекува намалување на цените на горивата.
Претседателот на Социјалдемократскиот сојуз на Македонија (СДСМ), Венко Филипче, упатувајќи критики до Владата за политиките што ги носи, ја обвини дека не презела ништо пред бранот поскапувања што ги погодува граѓаните.
Според Филипче, скокот на цените на горивата веќе предизвикува реакција кај основните прехранбени продукти.
Тој ја обвини Владата дека само го намалила ДДВ на горивата, мерка која, според него, не носи реален бенефит за компаниите поради повратот на ДДВ, ниту за граѓаните бидејќи основната цена пораснала.
Опозициската партија бара итно усвојување пакет-мерки, како што е случајот и во земјите од регионот. Филипче го упати Мицкоски да ги погледне архивите во Владата за да види како работеле претходните влади за време на кризите и да им излезе во пресрет на граѓаните.