За избор на градоначалник в недела ќе се гласа во 32 општини и Градот Скопје, а на три избирачки места во Општина Шуто Оризари ќе се повтори гласањето за советници
Вкупно 1 013 375 избирачи имаат право на глас во вториот круг од локалните избори на 2 ноември. За избор на градоначалник в недела ќе се гласа во 32 општини и Градот Скопје, а на три избирачки места во Општина Шуто Оризари ќе се повтори гласањето за советници поради утврдени нерегуларности на гласањето на 19 октомври.
Според информациите на Државната изборна комисија (ДИК), за вториот круг од локалните избори пријавени се 4 826 болни и изнемоштени лица, а најмногу има пријавено во Кичево – 823.
Болните и изнемоштените лица, затворениците и лицата во домашен притвор ќе гласаат утре.
Ноќеска на полноќ завршува изборната кампања и почнува молкот кој ќе трае до 19 часот в недела, кога ќе се затворат избирачките места во општините во државата на кои има гласање во вториот круг.