Уапсени се повеќе од 260 лица кои учествувале во изградбата на зградите кои се урнаа во земјотресот, а дел од нив се обиделе да побегнат од Турција
Во Турција денеска започна првото големо судење поврзано со изградбата на зградите кои се урнаа во катастрофалниот земјотрес од февруари 2023 година, во кој загинаа повеќе од 50 000 луѓе, а во овој случај станува збор за хотелот „Исијас“ во Адијаман.
Според турските медиуми, пред судот во Адијаман (југоисточно од земјата) се појавиле 11 обвинети, меѓу кои и сопственикот на хотелот, а обвинети се за „свесно невнимание“ при надзорот на изградбата на десеткатницата која се урна во земјотресот, при што загинаа 72 лица, меѓу кои 42 адолесценти, кипарски Турци, кои беа на спортски натпревар.
Им се заканува затворска казна до 20 години
Според обвинението, најмалку еден од катовите на хотелот бил незаконски дограден. Во вештачењето е утврден и многу слабиот квалитет на употребениот градежен материјал. Обвинетите се соочуваат со повеќе од 20 години затвор.
Градот Адијаман се наоѓа на помалку од 100 километри од епицентарот на земјотресот со јачина од 7,8 степени според Рихтеровата скала кој се случи на 6 февруари 2023 година. Градот беше уништен во земјотресот.
Во земјотресот загинаа повеќе од 50 000 луѓе во Турција и 6 000 во Сирија.
Уапсени се повеќе од 260 лица кои учествувале во изградбата на зградите кои се урнаа во земјотресот, а дел од нив се обиделе да побегнат од Турција.
Ердоган се извлече без политичка одговорност, ги обвини градежните компании за штетата
Градителот на 12-катница во Антакија наречена Ренесансна резиденција, чиишто неколку стотици жители загинаа под урнатините, беше уапсен на аеродромот во Истанбул на 10 февруари додека се обидувал да побегне во Црна Гора.
Турскиот претседател Реџеп Таип Ердоган не претрпе политичка штета од земјотресот и беше реизбран неколку месеци подоцна.
Ердоган за големиот број жртви во земјотресот ги обвини градежните претприемачи кои им плаќале на локалните инспектори за да можат да користат евтини материјали и незаконски да доградуваат катови на зградите.
Критичарите на Ердоган обвинија дека повеќето од големите градежни компании во земјата се тесно поврзани со владејачката партија АКП.