Претседателот на кочанскиот Основен суд вели дека секој што постапувал како судија на претходна постапка согласно одредбите од Законот за кривична постпака, односно член 33 од овој закон понатаму не може да учествува како судечки судија, член на Совет за оцена на обвинителни акти итн
Во кочанскиот суд се постапува по изјавени жалби на судии на претходна постапка во врска со пожарот во т.н. кабаре „Пулс“ во Кочани која се случи на 16 март, вели претседателот на Основен суд Кочани, Спиро Борисов.
Тој вели дека во тек е истражна постапка за трагедијата во која животот го загубија 61 лице, а близу 200 беа повредени.
„Во тек е е истражна постапка. Се постапува по изјавени жалби на одлуки на судии на претходна постапка и тоа е во моментов што можам да ви го дадам како изјава“,
рече Борисов.
Тој нагласи дека секој што постапувал како судија на претходна постапка согласно одредбите од Законот за кривична постпака, односно член 33 од овој закон понатаму не може да учествува како судечки судија, член на Совет за оцена на обвинителни акти итн.
Борисов додаде дека тројца судии од овој суд постапуваат во претходна постапка.
„Постапувааат тројца судии. Ние сме суд со пет судии, вклучително и јас како претседател на судот, тројца судии, двајца од судиите постапуваат во Кривичен совет и делегиран судија од друг Основен суд кој би можел да постапува како судија во суд со проширена надлежност“,
рече Борисов.
Претседателот на Судскиот совет, Александар Камбовски во однос на трагедијата рече дека уште е рано да се разговара за тоа што доколку во Кочани не може да се реализира судењето.
„Мислам дека е рано за тоа да разговараме. Се во свое време. Судскиот совет е во тек. За тоа не треба да одлучува Судскиот совет. Ќе се постапи согласно законот“,
рече Камбовски.
За трагедијата во т.н. кабаре во Кочани, локалното Основно јавно обвинителство отвори истрага против вкупно 27 физички и три правни лица. На 21 лице им е одреден ефективен затворски притвор од 30 дена, додека тројца осомничени добија куќен притвор. На тројца, меѓу кои беше и сега починатиот Александар Карадаковски, управителот на т.н. кабаре „Пулс“ во Кочани, не им беа одредени никакви мерки бидејќи беа на лекување.
Откако министерот за здравство Арбен Таравари потврди дека Карадаковски им подлегнал на повредите во болница во Литванија и е 60. жртва од трагедијата во Кочани, Основното јавно обвинителство Кочани ќе ја запре истражната постапка за него.
Во одделна истрага, исто така, поврзана со пожарот во Кочани, што ја отвори Основното јавно обвинителство за гонење организиран криминал и корупција (ОЈО ГОКК) во притвор завршија седум поранешни високи полициски службеници од Штип и Кочани.