Пратениците на ВМРО-ДПМНЕ и ВЛЕН истакнаа дека тоа што не гласаа не значи дека се против одржување на надзорна расправа, туку се за опфаќање и на сите други претходни трагедии како модуларната болница во Тетово, „Беса транс“
На денешната собраниска Комисија за политички систем и односи меѓу заедниците не помина иницијативата на „Европски фронт“ за одржување надзорна расправа за истрагата за трагедијата во Кочани. За иницијативата гласаа четворица члена на Комисијата на политичките партии „Европски фронт“ и СДСМ.
Садула Дураки од ДУИ, откако не беше изгласан дневниот ред за да се расправа за оваа точка, рече дека мнозинството не ја прифатило иницијативата доставена од „Европскиот фронт“ зашто не сака да се обелодени вистината за трагедијата во Кочани.
„Неставањето на дневен ред на оваа иницијатива каде сите институции треба да ја обелоденат вистината и да бидат транспарентни е затоа што зад ова стои вистината. Вистината на ова дело е дека во Кочани во таа дискотека беа убиени од страна на Мицкоски и Тошкоски. Мицкоски е опфатен индиректно, додека Тошкоски и неговите соработници на директен начин се опфатени со случајот Кочани. Ставете го на дневен ред и немојте да ги браните Мицкоски и Тошкоски“,
рече Дураки.
Блерим Беџети од ДУИ рече дека ќе ги искористат сите средства согласно Деловникот и побара тој да се почитува и да се овозможи дебата.
„Како ова да го разбере јавноста. Треба да дебатираме и да видиме дали е ова демократска држава или оди кон широк тоталитаризам“,
рече Беџети.
Според Фатмир Битиќи од СДСМ, иницијатива доаѓа од коалиција која, како што рече, политички не е удобна, но е исправна затоа што отвора простор за расправа.
„Првпат се случува во Собрание да некој не даде можност да кажеме дали треба или не треба да има надзорна расправа. Не е иницијатива поднесена од мојата пратеничка група, но како татко, брат на тие што загинаа поради институционални пропусти сметам дека треба најмалку Собранието да дозволи да се разговара“,
рече Битиќи.
Тој додаде дека 61 лице се загинати, а „ние сè уште политички сакаме поени дали требало надзорна расправа, Анкетна комисија“.
„Луѓе, нема веќе време. Обвинителството нека си работи, но ние како пратеници мора да кажеме дали сакаме или не сакаме вистината да излезе на површина“,
додаде тој.
Пратениците-членови на ВМРО-ДПМНЕ и ВЛЕН истакнаа дека тоа што не гласаа не значи дека се против одржување на надзорна расправа, туку се за опфаќање и на сите други претходни трагедии како модуларната болница во Тетово, „Беса транс“.
Тие потенцираа дека додека има активна истрага за случајот во Кочани, Собранието не би било добро да одржи надзорна расправа оти, тоа, како што нагласија, би било како вршење притисок и мешање во овој процес. Според нив, тие лица што во минатиот мандат блокирале и не правеле кворум во Анкетната комисија да се расправа за трагедиите во модуларната болница и „Беса транс“, сега бараат да се расправа за трагедијата во Кочани.
Основното јавно обвинителство Кочани вчера до Основниот суд во Кочани достави предлог за определување мерки за претпазливост за последниот 19-ти осомничен на кого беше проширена истрагата за пожарот во кочанското т.н. кабаре „Пулс“, информираа од Обвинителството.
Бројот на осомничени за пожарот во „Пулс“ во Кочани достигна 52 физички и три правни лица, откако Обвинителството викендот ја прошири истрагата со уште 19 лица.
Од новоосомничените, тројца се министри за економија, тројца овластени градежни инспектори во Општина Кочани, тројца директори на Дирекција за заштита и спасување (ДЗС), еден генерален инспектор во ДЗС, три службени лица во Министерство за економија, двајца државни секретари во Министерството за економија и четири пазарни инспектори во Државниот пазарен инспекторат (ДПИ).
Актуелниот министер за економија не е опфатен со истрагата, бидејќи според Обвинителството, досега нема ниту еден доказ дека од него било побарано продолжување на лиценцата на објектот на „Пулс“ во Кочани.